Къыралдан жер юлюшню ортакъгъа алыргъа сюе эсегиз

Жер юлюш сатып алыргъа ахчагъыз болмай, алай юй сюерге, бахча бла кюреширге сюе эсегиз, участканы ортакъгъа алыр амал барды. Бу материалда аны жорукъларыны эмда энчиликлерини юсюнден айтайыкъ.

Законну излемлери

Жер бла байламлы бар жумушла жаланда Жер кодексге тийишлиликде тамамланыргъа керекдиле. Сёз ючюн, къырал неда муниципал иеликде болгъан участкаланы инсанлагъа ортакъгъа берирге амал барды. Аны юсюнден кодексни 22 статьясында айтылады. Анда белгиленнгенича, тыш къыраллы эмда гражданстволары болмагъан инсанла жерни ортакъгъа алыргъа боллукъдула. Закон бла белгиленнген эм тийишли амал алагъа жаланда ма олду.

Не сейир, жер юлюшню ортакъда тутхан инсан аны хайырланыргъа эркинликни башхагъа берирге боллукъду. Ол, сёз ючюн, элчи неда фермер мюлк эсе, субаренда келишим бла. Алай ортакъгъа ол жерде орналгъан мекям неда бир тюрлю объект алына эсе уа, хайырланыргъа эркинлик жаланда ма алагъа бериледи, жерни кесине уа угъай. Багъасы, болжалы – ала бары да келишим бла тохташдырыладыла.

Неллай бир заманнга алыргъа жарайды?

Неге хайырланыргъа сюйгенигизге кёреди ол. Битеуда 20 сылтау барды мында. Ортакъны эм узакъ болжалы 49 жыл бла чекленеди. Ма талай сылтау:

• Юй сюерге – 20 жыл.
• Кёп къатлы мекям сюерге неда аны реконструкциясын этерге – 10 жыл.
• Элчи мюлк къураргъа – 3 жыл.
• Эл мюлк бла кюреширге умут этген организациягъа – 5 жылгъа.

Къаллай чеклениуле бардыла?

Ала жер не категориягъа киргенини эмда ортакъгъа не ючюн алынырыгъына кёре боладыла.

Сёз ючюн, эл мюлк жерде тынгылы мекям сюерге жарамайды. Быллай участкаланы алагъа заран салмазча алай хайырланыргъа къоядыла. Бир-бир жерлени тазаларгъа окъуна чек салыныучуду, башхаларын а сакъларгъа керекди деген жорукъ барды. Алай бла жер сиз умут этген ишге жарар ючюн, быллай чеклениулени юсюнден аллындан билирге керекди.

Жерни ортакъгъа: сатыу-алыу амал бла

Участканы ортакъгъа къалай алгъын? Сатыу-алыугъа къатышыу, баям, эм женгил амал болур дейбиз. Анга кёре жер ючюн эм уллу багъа тёлерге хазыр болгъан алады аны ортакъгъа. Бу жумушха электрон формада къатышыргъа да жарайды. Аны этер ючюн,  «ГИС-торги» порталгъа эсепге турургъа эмда электрон къол салыргъа эркинликни алыргъа керекди. Ызы бла тийишли платформалада торглагъа къатышыргъа жарайды, сёз ючюн, «Росэлторг» неда «Земля.дом.рф» дегенледе.

Алада иш былай барады: бир жер участкагъа умут этгенле заявкаларын къоюп, алада неллай бир тёлерге хазыр болгъанларын билдиредиле. Кимни багъасы уллу болса – ол хорлайды. Кёбюсюнде ол рынокда жюрюген багъаладан азыракъ болуучуду. Ол себепден быллай сатыу-алыулагъа къатышыу хайырлыды.

Ары дери уа жерни сайларгъа керекди: сюйсегиз интернетде табыгъыз, сюйсегиз а информацияны муниципалитетден алыгъыз. Ызы бла задаток къоюп, къагъытланы хазырларгъа тийишлиди: ахча тёленнгенни кёргюзтген документни, заявканы, паспортну. Торглада хорламай къалсагъыз, задатокну юч кюнню ичинде кесигизге къайтарыргъа керекдиле. Хорлагъан эсегиз а, аны Росреестрде эсепге салыргъа борчлусуз.

Жерни ортакъгъа: сатыу-алыу этмей

Бир-бирледе жерни торглагъа къатышмай алыргъа онг барды. Ма бу кезиуледе:

• Ишленип бошалмай тургъан мекямны (юйню) иеси аны къурулушун эбине жетдирирча жерни ортакъгъа алады.
• Хазыр мекямны иеси ол орналгъан жерни алады ортакъгъа.
• Тийрени тынгылы айнытыргъа келишимни этген инсан неда компания жер участканы торгла бардырмай алыргъа боллукъду ортакъгъа.
• Жери къырал неда муниципал жумушлагъа сыйырылгъан инсан неда компания башха участканы ортакъгъа торгла бардырмай алыргъа эркинди.
• Чеклери тохташдырылмагъан жерни ортакъда тутхан адам ол жумушну этерин излеп, андан сора, ол тийреге умут этген башхала чыкъмасала, аны ортакъгъа торгла бардырмай алыргъа эркинди.

Жер юлюшню бу халда ортакъгъа алыу бек иги амалды, алай анга сылтау болургъа кереклисин кесигиз кёресиз.

Жерни сатып алыргъа боламыды?

Жер сатылыргъа боллукъ эсе, эм биринчиден, ол онг аны ортакъда тутхан инсаннга бериледи – аны юсюнден келишимде аллындан окъуна айтылыучуду. Анга асламысында женгил онгла бериледиле (багъасы кадастр мардада неда рынокда жюрюгенден аз). Ма ол себепден, юй ишлерге сюе эсегиз, алай жерни сатып алыргъа ахчагъыз жокъ эсе, аны шёндю ортакъгъа алып, артда уа, бара баргъан заманда, сатып алыргъа да жарайды.