Къачан да барды бахчада этер зат

Бахча ишле асламысында жаз башы бла байламлы болуучудула. Аны тазалау, жерни къазыу, урлукъ салыу, тереклени бутакъларын кесиу жумушланы кезиую ма олду. Жайда бла кюзде тирлик жыйыу барады. Кёпле аны бла бахчада хар ауара да тауусулгъан суна болурла. Алай ол а алай тюйюлдю, Россельхозараны келечилери бу айда анда не зат этерге кереклисини юсюнден айтхандыла.

Августда алмаланы бла кертмелени жыяргъа хазырланыргъа керекди. Аны бла бирге уа келир жылда тирликни къайгъысын да этерге.

Бу айда заранлы къурт-къумурсхаланы къырыргъа, битимлеге бла тереклеге семиртгичле эмда суу салыргъа керекди.

Къабарты-Малкъарда быйылгъы жай бек исси, къургъакъ болгъаны ючюн, шёндю алмалагъа заран салгъан къубаллек жайылгъанды. Иш былай барса, ол кёп да созмай энтта да жангы тёлю къоярыкъды. Алманы кеч бишген сортларына заран салгъан къумурсхагъа къажау ишде люфенурон бла дифлубензурон деген затладан жарашдырылгъан дарманланы хайырланыргъа боллукъду. Жемиш тереклени онгларын алгъан (къуртла, губула, битле…) затла жайны ахырында кёп боладыла, аны ючюн алагъа къажау мадар этерге керекди. Алай химия препаратланы бу кезиуде бек сакъ хайырланыргъа тийишлиди. Нек дегенде, ала жемишледен иги кесек заманны кетедиле. Аны ючюн болжаллары 5 кюнден озмагъан затланы хайырланса игиди.

Семиртгичле салыу эмда сугъарыу да керекди августда. Бегирекда быйыл, къургъакълыкъ бек сезилген жылда.

Семиртгичлени салырдан алгъа терекни тюбюн иги мылы этигиз, сууну аямагъыз. Ызы бла тёгерегинде жерни тырнап, ары бу затланы да жайып, башын жабыгъыз. Шёндю семиртгичлени фосфор-калий тюрлюлеринден, дагъыда гумин кислотадан этилгенлерин, сёз ючюн, «Здоровый урожай» дегенни хайырланыгъыз. Сюйсегиз а,  мешхут жайыгъыз.

Быйылгъы тирлик доюн болмаса да, тереклеге (алмаланы бла кертмелени жыяргъа 20 кюн алгъа) семиртгич салмай жарарыкъ тюйюлдю. Ол аны келир жылгъа ёсюмюн къураргъа себеплик этерикди. Нек дегенде, терекле топуракъдан битеу болгъан хайырлы затланы кеслерине аладыла. Игиси – жерни пробасын лабораториягъа элтип, агрохимия жаны бла къурамын тинтип билсегиз. Препаратла уа Россей Федерацияда хайырланыргъа жараулу пестицидлени бла агрохимикатланы тизмесинде болургъа керекдиле.

Сорууугъуз бар эсе, Россельхозараны Къабарты-Малкъарда бёлюмюне барыгъыз неда сёлешигиз. Аны адреси бла телефон номери: Нальчик, Малкъар орам, 100, 8(8662)74-25-74.