Малланы жукъгъан ауруудан сакълауну амалы бирди - сакълыкъ

Нодуляр, башхача айтханда, узелковый дерматит, бек къыйын мал ауруугъа саналады. КъМР-ни Ветеринария управлениясыны специалистлери айтханларына кёре, бу инфекция терк жайылгъанладан бириди, кеси да малчылыкъгъа уллу заран салады.

Бир жаны бла анга жукъгъан тууарланы он проценти къырылыргъа боллукъду. Алай ауруу уллу къоранчла келтиргени бла да белгилиди: малланы сютлери азаяды, ала арыкъ боладыла, ийнекле тёлю келтиралмай башлайдыла. Къарыусуз малланы ол онгларын бек алады. Аланы къалтырауукъ алады, къыйын солуйдула, ичлери ётеди, терилери чапырады, юслеринде саргъылдым къотурла чыгъадыла, ызы бла ала ирин этип башлайдыла. Быллай малланы кёзлеринде да жарала чыгъадыла, ауузларындан бла бурунларындан а шыты келеди.

Малладан сора, бу ауруугъа къойла бла эчкиле да жугъадыла. Адамгъа уа ол къоркъуулу тюйюлдю. Бу затны шёндю тюзюнлей багъыу амалы шёндю жокъду; алимле тийишли вакцинаны энтта да къурамагъандыла. Аны ючюн нодуляр дерматитге жукъгъан малланы союп къурутургъа рекомендация бериледи.

Мюлкледе ыллай заранлы затха тюбемез ючюн, бек биринчиден, профилактика амаллагъа уллу кёллю болмазгъа тийишлиди. Ол санда маллагъа кезиуден кезиуге тынгылы къараргъа, халлерин тинтирге, ишекликге тюшгенлени башхаладан энчи (карантинде) тутаргъа, къоркъуулу регионладан тууарла неда малчылыкъ продукция сатып алмазгъа, аурууну жайгъан затлагъа къажау ишни да дайым бардырып турургъа керекди.

Малда бу аурууну белгилери эсленип тебиреселе неда тууарла сунмай тургъанлай къырылып башласала, аны юсюнден регионну Ветеринария управлениясына 8 (8662) 40-64-38 неда Ветеринария медицина арасына 8 (8662) 40-54-35 номерле бла сёлешип билдирирге керекди.