Туризм жаны бла ишлерге гитчеликден кёллендире

«Радуга» реабилитация арада сабийле бла «Биринчилени атламлары» битеуроссей къымылдауну регионда бёлюмюню, Курортла эм туризм министерствону, Орус география обществону «Альтаир» клубуну келечилери тюбешгендиле.

«Биринчилени атламлары» организацияны бёлюмюню башчысыны орунбасары Валерия Баваш августну ортасындан башлап арада «Биринчилени заманлары» смени ётдюрюлгенин билдиргенди. Битеу республикадан анга эришиуледе хорлагъан 80 адам – къымылдауну активистлери айырылгъандыла. Ала бла эки ыйыкъны ишлегендиле, спорт эм билимлерин ёсдюрюрча оюнла, белгили адамла бла тюбешиуле къурагъандыла. Валерия Баваш чертгенича, аланы баш борчлары къымылдауну чегинде урунурукъ тири жаш адамланы хазырлауду, ала артда кеслерини районларында ишлерикдиле, сора Биринчилени регион советине да кирликдиле. Организацияда туризм бла жолоучулукъла уллу жерни алгъанлары себепли уа профильли министерствону келечилери да чакъырылгъандыла, дегенди ол.

Курорта эм туризм министерствону жамауат бла байламлыкъла жюрютюу эмда маркетинг жаны бла бёлюмюню башчысы Ольга Погребняк айтханнга кёре, ала жаш тёлю биригиулени башламчылыкъларын жашауда бардырыргъа болушлукъну дайым да этедиле. «Андан тышында, жаш адамлагъа усталыкъ сайларгъа себеплик да этебиз, аланы туризм жаны бла ишлерге да кёллендиребиз. Къонакъбайлыкъда, адамланы солууларын къурауда, саулукъларын кючлеуде, жаяу туризмде, альпинизмде республикабызны онглары кёпдюле. Школда окъуй тургъанлай окъуна сабийле, усталыкъны туризм жаны бла алыргъа сюйселе, теория, практика жаны бла да сынам жыяллыкъдыла», - деп къошханды Ольга Погребняк.

«Альтаирни» башчысы Мокъаланы Тенгиз а сабийлеге клубларында не бал кюрешгенлерини, быйыл туризм, альпинизм, къаялагъа ёрлеу бла байламлы къаллай проектле тамамлагъанларыны юсюнден билдиргенди эмда аланы туугъан жерлерини тарыхын терен билирге, жолоучулукълагъа атланыргъа, фахмуларын айнытыргъа чакъыргъанды. 

- Жерибизни табийгъаты тамашалыкъды, алай аны эм уллу байлыгъы уа адамладыла, маданиятды, миллетлени араларында кёп жылланы сакълана эм кючлене келген шуёхлукъду. Туризм, бютюнда таулагъа жолоучулукъла, адамланы, ала къайсы динни, халкъны келечилери болгъанына къарамай бирикдиреди, къыйын чакъда бир бирге билеклик этерге юйретеди, сынам жыяргъа, керти тенгле табаргъа болушады, сора, сёзсюз, деменгили табийгъатны кючюн кёргюзте къууандырады», - деп чертгенди ол.

Сабийле да, къонакълагъа тынгылай, усталыкъ сайлау бла байламлы соруула бергенди, туризмде къаллай жетишимле бла чурумла болгъанларыны юсюнден да билирге сюйгендиле. Ала турист объектлени, тарых эм табийгъат эсгертмелени, турист маршрутланы юслеринден толуракъ билирге да сюйгендиле. Ахырында уа алагъа виртуальный кёзюлдюреуюклени болушлукълары бла республикада жолоучулукъ этерге неда альпинист снаряжение бла ишлеп кёрюрге онг берилгенди.