Жолда жюрюу къоркъуусуз болурча

«Жолда жюрюуню жаш инспекторлары» деген битеуроссей республикабызда да бардырылгъанды. Анга кёре, жаш велосипедчилени дерследе жолда жюрюуню жорукъларына юйретирикдиле. Проект Сабийлени бла жаш тёлюню чыгъармачылыкъ арасында тамамланылады. Аны мураты сабийлени велосипедледе бла самокатлада кеслерине, башхалагъа да къоркъуу салмай учаргъа юйретиудю, шахар болумлада жолда жюрюуню жорукълары бла шагъырейлендириудю.

- Республикабызда къырал даражалы, сейир, керекли да проект башланнганын белгилерге сюеме. Сиз устазларыгъыз бла бирге жаяу жюрюгенлеге, башха велосипедчилеге бла водительлеге жолда къоркъуусуз жюрюуню, низамны ахшы юлгюсюн кёргюзтюрюгюзге ийнанама, - дегенди МВД-ны КъМР-да Къырал автоинспекциясыны управлениясыны бёлюмюню башчысыны орунбасары Алла Моторова.

Жолоучулукъ паркны араны къатында кесегинден башланнганды, алайда инструкторла къайры барлыкъларын кёргюзтгендиле, насийхатла этгендиле. Сабийлеге шлемле, жингириклерин ачытмазча керекле, къарангыда жарыкълыкъ берген кийимлени юлешедиле.  Алагъа, жолда жюрюуню жорукълары толтурулмасала, къоркъуусуз болумладан хата чыгъаргъа боллугъу ангылатылгъанды. Тохтагъан жерлеринде устазла сабийле ангыларча тынч тилде тюз жолну къалай сайларгъа боллугъун, жаяу баргъанла эм водительле бла байламлыкъланы юслеринден айтхандыла. Маршрутха кёре ала сегиз жерде тохтарыкъдыла. Солугъан кезиулеринде инструкторла сабийлеге жаяу баргъанлагъа чурум этмезге, бир бирлерине жер берирге кереклисин эсгертгендиле.

Араны сабийле жоллада ачымазча профилактика ишни бардырыу жаны бла къошакъ билим бериу бёлюмюню устазы Наталия Бетрозова чертгенича, сабийле чып тюшюуден сакълагъан амалла бла борчлу халда хайырланыргъа, жолну машинала жюрюген жерлерин жорукълагъа кёре ёте, велосипед жолчукълада бара билирге керекдиле. Жорукъланы, бек алгъа, ата-анала кеслери бузадыла. Ала электросамокатлада, сабийлени да алларында сюелтип неда олтуртуп барадыла, теркликлери сагъатха жыйырма беш километрден окъуна озады. Алай этерге уа арталлыда жарамайды, дегенди ол.

Проектни къурагъанла уа быллай жолоучулукъла тёрели халда бардырыллыкъларын, алагъа беш жюзден аслам сабий къашырыгъын да билдиредиле.