Усталыкъ хунерлерин ачыкълайдыла

«Эльбрус» атлы корпоратив университетде устаз къауумланы «Окъутабыз! Башчылыкъ этебиз!» деген республика даражалы эришиулери болгъанды. Ол, КъМР-ни Жарыкъландырыу эмда илму министерствосу бла байламлыкъда къуралып, бу жол экинчи кере бардырылады. Аны мураты уа усталыкъ хунерлери бийик болгъан, билимли эмда  окъуулу педагогланы ачыкълауду. Андан сора да, регионну билим бериу бёлюмюне кадрланы хазырлау бла байламлыды.

Эришиуге сексен адам къатышады. Аладан а оналты къауум къуралгъанды. Ала уа республиканы районларыны, билим бериу махкемелерини келечилеридиле. Къауумланы араларында мектеплени таматаларыны орунбасарлары, устазлары, методистлери да бардыла. Тохташдырылгъан низамгъа тийишлиликде, жыл санлары 45-ге жетеди.

Черек районну жыйымдыкъ командасы да конкурсха тири къатышады. Аны санында уа Огъары Малкъарны битеулю билим берген экинчи номерли мектебини директоруну юйретиу иш жаны бла орунбасары Гадийланы Аслижан, школну таматасыны юйретиу иш жаны бла кенгешчиси Асият Докшукина, тарыхдан бла обществознаниядан окъутхан устазы Атабийланы Альбина; Къашхатауну мектебинден труддан дерсле берген Раиса Курашева; Зарагижни школундан информатикадан окъутхан Ирина Шаова бардыла.

Жууукъ заманны ичинде, эришиуню эсеплери чыгъарылып, анда хорлагъанланы атлары белгили боллукъдула.