Къошакъ сынаула бардырыладыла

Быйыл тогъузунчу классланы бошагъанла ОГЭ-лени къошакъ халда бериуню заманы сентябрьде башланнганды. Сынауланы жазаргъа эркинлик мурдорлу кезиуде къырал эсеп аттестациядан ётмегенлеге неда аттестат алалмай къалгъанлагъа  бериледи.

Къошакъ заманда ОГЭ-лени 2 36 окъуучу жазарыкъды. Экзаменле республикада юч жерде – Нальчик бла Прохладный шахар округлада, Зольск районда – къуралгъан пунктлада бардырыллыкъдыла. Асламысында сынауланы математикадан, орус тилден, географиядан бла обществознаниядан жазарыкъдыла.

Алай бла алтынчы сентябрьде орус тилден болгъанды ОГЭ.  Ызы бла уа сабийле тарыхдан, биологиядан, физикадан бла географиядан сынаулагъа баргъандыла. Онючюнчю сентябрьде уа химияны, информатиканы, орус адабиятны сайлагъанла сынарыкъдыла билимлерин. Айны онсегизинчисинден жыйырма тёртюнчюсюне дери мурдорлу къырал экзаменлени къошакъ халда жазарча кюнле да белгиленнгендиле.

Быйыл школланы бошагъанлагъа ЕГЭ-лени къошакъ халда бериу да сентябрьде башланнганды. Эндиге дери жашла бла къызла аны орус тилден жазгъандыла. Бу жол анга 28 адам къатышханды. Сынаула жаланда бир пунктда – Нальчикни тогъузунчу номерли битеулю билим берген мектебинде – бардырыладыла. Тохташдырылгъан низамгъа тийишлиликде, экзаменни барыууна жамауат къараучула, федерал экспертле, официал сайтланы себепликлери бла онлайн-къараучула да къатышадыла.