Хыйлачылагъа ийнаннганла энтта табыладыла

Бир кюнню ичинде республиканы тёрт инсаны хыйлачыланы ыргъакъларына тюшюп, ахчаларын тас этгендиле. Аланы сомларын къоркъуусуз счётха салыргъа керекди  неда   байыкъланыргъа онг барды, деп алдагъандыла аманлыкъчыла.

Алай бла 24-жыллыкъ нальчикчиге бла 35-жыллыкъ прохладначы тиширыугъа ала кимле эселе да сёлешип, банкны къоркъуусуз бёлюмюню къуллукъчулары болгъанларын айтхандыла. Аланы ахчаларын урларгъа умут этедиле деп, сомларын «къоркъуусуз счётха» ётдюрюрге керекди деп алдагъандыла. Алай бла жаш адам 405 мин сомун, тиширыу а 150 минг сомун жалгъан банкирлеге бергендиле.

 Кахундан 25-жыллыкъ  тиширыугъа уа бонусла беребиз деп, ётюрюк айтхандыла. Анга ыразы болуп, ол аманлыкъчылагъа СМС бла келген кодну билдиргенди. Алай бла хыйлачыла аны мобиль  телефонунда банкны шартларын билип, аны атына  170 минг сом кредит алгъандыла.

 Майскечи 30-жыллыкъ тиширыугъа уа биреу сёлешип, тыш къыраллы акцияланы сатыу-алыудан файда тюшюрюрге боллугъун айтханды. Тиширыу белгили этилген счётха 207,5 минг сомун салгъанды, ол жетгенлей а, «инвестор» тас болуп къалгъанды.

 Республиканы хурметли жамауаты!  Право низамны сакълаучула ахыр кезиуде инвестицияла бла байламлы хыйлачылыкъла кёбейгенлерин билдиргендиле. Аманлыкъчыла адамланы финанс билимлери иги болмагъаны бла хайырланып, аланы  ахчаларын урлайдыла. Жылдан-жылгъа уа ала аланы амаллары тюрленеди, аманлыкъчыла къыйын терминле, белгили адамланы тукъумлары бла хайырланып, айтханларына ийнандырадыла.

- Интернетде  къоранчсыз къысха заманны ичинде файда алыргъа боллукъду деген чакъырыуну кёрсегиз, ышанмагъыз. Танымагъан адамла бла сёлешгенде, сакъ болугъуз. Дагъыда банкны келечилери ахчаны «къоркъуусуз счётха» ётдюрюрге керекди деп, телефон бла бир заманда да сёлешмегенлерин билирге кереди,-дегендиле бизге КъМР-де МВД-ны пресс-службасындан.