Кеслерине тартхан къыйматлы проектле

Къабарты-Малкъарда нартюхню тынгылы жарашдырырча уллу проектни жашауда бардырыр мурат этиледи. Инвесторла къыйматлы проектге 50 миллиард сом чакълы берирге хазырлыкълары да белгили болгъанды.

Ол толу кючю бла ишлеп башласа, мында суткагъа мирзеулюк нартюхден 500 тонна жарашдырыргъа жарарыкъды. Производствону эки жылны ичинде башларгъа онг барды. Болсада  бусагъатда аны жашауда бардырырча экономика модели сюзюле турады.

Белгилисича, республикада ёсген мирзеулюк битимлени арасында нартюх энчи жер алады эм тирликни да асламысы анга жетеди. Быйыл республиканы мюлклерини барысында да нартюх 128 минг гектарда ёсдюрюлгенди. Ол былтырдан иги да кёпдю.

Нартюх ёсдюрюу бла Къабарты-Малкъар Шимал-Кавказ федерал округда биринчи жерни алгъанын да энчи белгилерчады. Сёз ючюн, СКФО-да нартюхню ючден бири бизни регионда ёсдюрюледи. Былтыр 1,05 миллион тонна алыннганды. Быйыл арендаторланы андан кёп чыгъар деп умутлары барды. 

Эсге сала айтсакъ, жемишле сакъланнган комплекслени къурулушу да инвесторла эс бурурча файдалы бёлюмледен бирине саналады. Регионда терек бахчалыкълагъа къошула баргъаны бла алагъа да сурам ёседи. Ол себепден бюгюнлюкде 300 минг тонна тирлик сакъларча жерле къуралгъанлыкъгъа, азлыкъ этерге боллукъдула. Аны ючюн жууукъ заманда энтта да 50 минг тоннагъа жерле хазыр боллукъдула. Саулай алып айтханда, аланы санын 500 минг тоннагъа дери ёсдюрюрге умут барды.