Жангы окъуу жылгъа жангы умутла бла

Элбрус районну орта билим берген окъуу учрежденияларында эм зауукълу, эм насыплы кезиу башланнганды. Юч айны солуп, жангы кюч бла келген сабийле, аланы аталары бла аналары жангы умутла этедиле.

Районну битеу окъуу юйлеринде байрамгъа аталгъан линейкала сабийле жоллада ачымазча этерге керекли мадарланы юслеринден аудио амал бла жаздырылгъан лекциягъа тынгылаудан башланнганды.

Бийик жетишимлеге жетерге

Терс-Къолну мектебини арбазында, аламат макъамлагъа тынгылай, окъуучула тизилипдиле. Барысы да бирча омакъ, школ кийимле кийип.

Мында башланнган классла «Орлята России» деген битеуроссей къымылдаугъа къошулгъандыла. Гитчеликден сабийлени патриот сезимлерин кючлеу, Ата журтларына, туугъан жерлерине сюймеклик сингдириу программа толтурулады.

Олимпиадалада, окъууда да айырмалы болгъан окъуучула Хаджиланы Алина – Россей Федерацияны байрагъын, КъМР-ни байрагъын а Хапаланы Ансар кётюргендиле.

Билимни кюнюне аталгъан байрамда окъуучуланы алгъышлагъандан сора, сёзню мектепни таматасы Залийханланы Лейля Таусолтановнагъа бергендиле. Ол къонакъланы бла окъуучуланы Билимни эмда Республиканы къыраллыгъыны кюнлери бла алгъышлагъанды. Жаш адамлагъа ала Ата журтларына кертичи инсанла болуп ёсерлерин, иги окъуп, уллу жетишимлеге жетерлерин тежегенди.

Ызы бла быйыл 9-чу классны бошап, колледжлеге окъуугъа кирген алты сабийни бла 10-чу классха келген, школ жашауларын андан ары бардырыргъа таукелленнген жети окъуучуну, 11-чи классны эки окъуучусун да алгъышлагъандыла.

Кезиу байрамны эм гитче келечилерине жетгенди. Быйыл биринчи классха мында онжети сабий келгендиле. Алагъа къызыу къарсла бла тюбеп, сёзню биринчи устазлары Хаджиланы Фатима Магомедовнагъа бергендиле. Ол, хар жолдан да окъуучуланы 1-ден 4-ге дери окъутуп, тынгылы билим берип, ашырыуну баш борчуна санагъанын билдиргенди. Тёрт жылны ичинде сабийлеге бек байланнганын, алагъа жашаугъа, билимге да огъурлу жол ачаргъа итиниригин айта, аталаны бла аналаны, окъуучуланы барын да алгъышлагъанды. 21-чи ёмюрде бек кереклиси билим болгъанын унутмазларын тилегенди.

Кезиу назмулагъа, жырлагъа бла тепсеулеге жетгенде, сабийле фахмуларын кёргюзтгендиле. Биринчи къонгуроуну 11-чи классны окъуучусу Габоланы Муслим бла 1-чи классны окъуучусу Гюлюйланы Аиша зынгырдатхандыла.

Къучакълары гюлледен толуп

Чууакъ эрттенликде Нейтринода 1-чи классха барлыкъ 5 сабий тангнга ашыгъып чыкъгъандыла. Энди ала билимни, окъууну жолуна турадыла. Россейни битеу шахарларында бла эллериндеча, къууанчлы ауазла ол кюн мектепни арбазын толтургъандыла. Окъуучуланы ата-аналарыны, кёллери кётюрюлюп, къучакълары гюлледен толупдула.

Байрамны аллында, хар жердеча, биринчи Россейни, ызы бла КъМР-ни байракъларын кётюргендиле. Аламат назмула окъуп, къонакъланы къууандыргъандыла. Мектепни таматасы Къартлыкъланы Фатима Заурбековна, бюгюннгю кюнню энчилигин айтып, жаш адамла Ата журтларына кертичи инсанла болуп ёсерча школ не жаны бла да кюреширигин энчи чертгенди. Хар заманда, къайда болсала да, туугъан жерлерин унутмазларын тилегенди.

Байрамда жырладан бла тепсеуледен сора назмула да айтылгъандыла. Мектепни бийик даражасына, устазны таза кёлюне бла жууаш жюрегине аталгъан тизгинле хычыуун эдиле.

Биринчи къонгуроуну берирге сый 11-чи классны окъуучусу Накани Салимагъа бла 1-чи классны окъуучусу Накани Ясминагъа тюшгенди. Алагъа жыйылгъанла къызыу къарсла бла тюбегендиле. Байрам къууанчлы халда бошалгъанды. Сабийле устазлары бла бирге ариу жасалгъан классларына «Магъаналы затланы юсюнден ушакъ» дерслерине кетгендиле.

Жарыкъ халда

Кёнделенни Доттуланы Ахмат атлы 1-чи номерли школунда уллу, гитче да сюйген, ашыгъып сакълагъан байрам жарыкъ эм миллет макъамладан башланнганды. Аудио амал бла жаздырылгъан лекциягъа тынгылагъандан сора, байрамны сахнасына 1-чи классха келген окъуучуланы чакъыргъандыла.  Къууанчлы жыйылыуну аллында школну Россейни эм КъМР-ни байракъларын Балаланы Камилла бла Урчукъланы Къурман, Чочайланы Мурат бла Мусукаланы Арсен кётюргендиле.

Школну таматасыны кенгешчиси Атмырзаланы Лейля сабийлени окъуу жылны башланыуу бла алгъышлагъанды. Ызы бла «Сабийликни навигаторлары» деген битеуроссей акцияны чеклеринде 11-чи классланы окъуучулары биринчи классха келген сабийлеге «Келлик заманны самолётчукълары» акцияны чеклеринде, ичинде ариу алгъышла жазылгъан, къагъытдан ишленнген самолётчукъланы саугъалагъандыла. Ала аланы окъуу жылны ахырында ахыр къонгуроугъа дери сакъларгъа керек болгъанларын айтхандыла. Эндиге дери тёре болмагъан аллай саугъа 1-чи классланы окъуучуларына бек багъалы болгъанды.

Биринчи къонгуроуну къагъаргъа сыйлы жумуш а окъууда бла школну жашауунда жетишимли болгъан 11-чи классны окъуучусу Локияланы Рустамгъа бла 1-чи классны окъуучусу Селяланы Алиягъа берилгенди. Жангы окъуу жылгъа сабийле жарыкъ кёл бла атланнгандыла.

Хар бири да игиликге итине

Бедикни орта школуну арбазы омакъ жасалып, миллет макъамла согъуладыла. Билимни кюнюне аталгъан къууанчлы жыйылыуда сабийлени ышарыулары, гюллери эм зынгырдауукъ ауазлары, кюлюулери къонакъланы, керти да, сабий байрамгъа келгенлерин эслерине салгъанча, къууандыргъандыла. Байрамны аллында Россейни байрагъын – 11-чи классны окъуучусу Ахматланы Елизавета, КъМР-ни байрагъын а 9-чу классны окъуучусу Къулийланы Милена кётюргендиле.

Сахнада 1-чи классны окъуучулары бла аланы устазлары Селяланы Лейля Хусеевнагъа ызы бла 11-чи классны окъуучулары бла устазлары Бабаланы Фатима Азаматовнагъа къызыу къарсла бла тюбегендиле. Ол кюн сёз абаданлагъа, гитче сабийлеге да берилген эди. Хар бири да игиликге итине, бир бирлерин алгъышлай, жангы окъуу жылда жетишимли болурларын тежегендиле. Эс 4-чю классны окъуучуларына бла 9-чу классны окъуучуларына да бёлюннгенди. Ала быйыл школ жашауну бек магъаналы кезиулерини чеклеринде болгъанларын айта, алагъа алчыла болуп окъурларын тежегендиле.

Ызы бла кезиу алгъышлагъа берилгенди. Школну таматасы Чыпчыкъланы Фатимат жыйылгъанланы Билимни, Республиканы да кюнлери бла алгъышлап, окъуу жыл сабийлеге жетишимли боллугъуна ышаныуун билдиргенди. Андан ары Бедик элни администрациясыны таматасы Тилланы Абилни жашы Камал бла школну таматасыны орунбасары Раиса Бадиновна Жемухова алгъышлау сёзлерин эшитдиргендиле. Ала элни аты къайда да иги бла айтылырын тежегендиле.

Жырла, тепсеуле, назмула уа байрамны бютюнда жарыкъ этгендиле.  Жыйылыуну ахырында, биринчи къонгуроуну 11-чи классны окъуучусу  Макитланы Азрет бла 1-чи классны окъуучусу Алия Санна Гудсон бергендиле.

Тырныауузну мектеплеринде

Тырныауузну 1-чи номерли лицейинде, 5-чи номерли гимназиясында бла В. Кузнецов атлы 6-чы номерли школунда Билимни халкъла аралы кюнюн къууанчлы белгилегендиле. Ары келген къонакъла, атала бла анала, окъуучула бир бирлерин алгъышлай эдиле. Мектеплени арбазлары гюлледен бла кёп тюрсюнлю шарладан толу эди. Алада къонакъда районну къуллукъчулары – КъМР-ни Парламентини Урунуу, социал политика эмда саулукъ сакълау жаны бла комитетини келечиси Хасаитланы Елизавета, районну администрациясыны эм Билим бериу управлениясыны келечилери, Элбрус районну жер-жерли самоуправлениясыны советини председатели Тохаланы Хыйса, Элбрус муниципал районну администрациясыны таматасыны орунбасары, Элбрус муниципал районну Билим бериу управлениясыны жаш тёлю политика жаны бла бёлюмюню таматасы Атмырзаланы Алиса, окъуучуланы  аталары бла аналары болгъандыла. 

Мектепледе Россейни эм КъМР-ни байракъларын къууанчлы халда кётюргенден сора, алгъышла башланнгандыла. Школланы таматалары Мухамед Лихов, Моллаланы Фатимат эм Ахматланы Зульфия окъуучуланы алгъышлап, къонакълагъа да ыразылыкъларын билдиргендиле. Сёз 1-чи класслагъа жетгенде уа, ала кеслерини фахмуларын кёргюзтюп, назмула бла жырла айтхандыла. Биринчи къонгуроуну тамата классланы айырмалы окъуучулары бла 1-чи классланы сабийлери бергендиле. 5-чи гимназияда биринчи къонгуроуну Ашуевланы кёп сабийли юйюрлери къакъгъандыла. Байрам жыйылыула жарыкъ тепсеуле бла бошалып, окъуучула биринчи дерслерине классларына кетгендиле. Билимни жолуна огъурлу кюнде!