Жюрек-тамыр аурууладан къыйналгъан саусузланы багъыуну андан ары игилендириуге къайгъыра

Къабарты-Малкъар Республиканы Башчысы Казбек Коков КъМР-ни Бийик медицина технологияла арасыны кардиология диспансерини иши бла шагъырейленнгенди, аны «Жюрек-тамыр ауруулагъа къажаулукъ» регион проектге тийишлиликде шёндюгюлю бийик технологиялы медицина оборудование бла андан ары жалчытхандыла. Жолоучулукъну чегинде республиканы оноучусуну биргесине КъМР-ни Правительствосуну Председатели Мусукланы Алий, КъМР-ни саулукъ сакълау министри Рустам Калибатов, араны баш врачы Герман Докшоков болгъандыла.

Казбек Коков араны таматалары бла аны айнытыу онгланы сюзгенди эмда специалистлени коллективине ыразылыгъын билдиргенди. «Бу медицина махкемени ишини юсюнден адамла ыразылыкъ бла айтадыла, ол бек магъаналыды. Адамла къайгъырыулукъну кёрселе, саулукъ, жашау бла байламлы бийик качестволу къырал жумуш тапдырылса, ол бек къыйматлыды.  Медицина болушлукъну игилендириу жаны бла битеу башламчылыкъларыгъыз не жаны бла да болушлукъ табарыкъдыла», - деп чертгенди ол.

Республиканы таматасына жангы оборудованияны кёргюзтгендиле. Махкемени диагностика базасы къан-тамыр ызланы не жаны бла да толуракъ тинтген, шарт диагноз салгъан, жюрек аурууну артда къыйын халын болдурмазча, аурууланы тюз башланнган кезиулеринде ачыкъларгъа онг берген программа функционалы бла компьютер томограф бла толтурулгъанды.

Дагъыда ишлей тургъан ангиографха энтта бир установка салыннганды, экинчи рентген-операционный ачарча. «Энтта бир, бютюн жангы, ангиограф установка операцияланы тирирек бардырыргъа, рентген-эндоваскуляр къатышыуну излеп тизме бла неда  терк болушлукъ керек халлада келген саусузлагъа теркирек къараргъа онг берликди. Алай бла, тюрлю-тюрлю ишемиялада, ол санда ургентныйледе къанны жюрюуюн тапландыргъан жашау магъаналы процедураны сакълауну болжалы иги да къысхартыллыкъды», - деп ангылатханды Герман Докшоков.

Кардиодиспансерни реанимация бёлюмюне деп республикалы бюджетни ырысхысына пациентлени 18 монитору эмда ара монитор станция сатып алыннгандыла. Система реанимация заллада мониторла хар саусуздан алгъан жашау этиу саулукъ кёрюмдюлени дежурный врачны бир уллу экранына чыгъарады. Аллай тохтаусуз къарау, саусузну саулугъу осалгъа айланса, заманында анга болушлукъ тапдырыргъа онг береди. Андан сора да, диспансерге стресс-эхокардиографиягъа установка эмда жеринден тепдирилген хакъ бла ишлеген рентген-аппарат берилгенди, дагъыда мекямда лифтёрну кабинада турууун излемеген ауур жюк-пассажир больница лифт алышындырылгъанды.

Бусагъатда кардиодиспансерде тынгылы ремонт бардырылады, мекямны тышы, шёндюгюлю материалланы хайырланып, толусунлай жангыртыллыкъды, тийре да тапландырыллыкъды.

Республика былтыргъы жылны эсеплерине кёре, регион проектни битеу целевой кёрюмдюлерине жеталгъанын белгилерчады. Медицина техниканы магъаналы жангыртылыныуу жюрек-тамыр аурууладан къыйналгъан саусузланы багъыуну андан ары игилендириуге бурулупду.