Ток ызлада бузукълукъну хатасындан от тюшгенди

МЧС-ни регионда Баш управлениясындан билдиргенлерине кёре, алгъаракълада Нарткъалада бояу цехге от тюшгенди, къыйын болумну кезиуюнде оборудование, лак бла бояу керекле, мекямны битеу да 80 квадрат метр чакълы бир жери кюйгендиле. Аны сылтауларын тохташдыргъанда ведомствону дознаватели электрощит авария халда ишлегенин ачыкълагъанды.

 Бу болум бла байламлы управлениядан электричество эсепден чыкъгъынчыгъа дери хайыр келтиргенин белгилейдиле. От тюшюуге келтирген сылтауланы араларында электроызлада бузукълукъла экинчи жерни аладыла. Аланы монтажларында, бир бирге бегитилген жерлеринде неда бир ызгъа асыры кёп зат салыннганда кемчиликле бар эселе, аланы кеслерин билдирмей хазна къоярыкъ тюйюлдюле. Аны ючюн МЧС быллай эсгертиуле этеди:

- эски неда бузукълугъу болгъан ызланы хайырланмазгъа;

 - электричество бла жылытхан приборланы хайырланнганда сакъ болургъа, жорукъланы унутмазгъа;

 - жандырылгъан приборну къараусуз къоймазгъа, сабийлеге анга жууукълашыргъа эркин этмезге;

- автоматика предохранительлени салыргъа;

- электрика вилкаланы, розеткаланы халларына дайым къарай турургъа, ала къызып башлагъанлары быз ызгъа ачыры кёп ауурлулукъ баргъанын неда приборланы кеслерини ишлеулеринде бузукълукъ болгъаныны биринчи шартыды;

- от тюшгенини юсюнден билдирген автоном системаны орнатыргъа, тютюн чыкъгъанлай, ол олсагъатлай билдирликди.

Ведомствода чертгенлерича, бу къыйын болмагъан жорукъла адамланы, мюлклени да хатадан сакъларгъа болушурукъдула, къоркъуусузлукъ а, эм алгъа, инсанны кесинден башланады.