Бийикликлеге итиниую бла айырмалы

Республиканы сюд приставлары, кеслерини борчларын толтургъанлары бла чекленмей, башха бийикликлеге да итинедиле. Ма бу кюнледе Баш эм Арбитраж сюдледе приставланы къауумуну башчысы Сотталаны Магомет Элбрусха ёрлегенди. Бу эрттегили муратын толтурургъа анга хар жаны бла да хазыр болгъаны болушханды. Ол Сюд приставланы федерал службасыны бёлюмлерини араларында бардырылгъан эришиулеге кёп кере къатышханын, алада да алчы жерлеге чыкъгъанын белгилерчады.

- Элбрусха чыгъарны аллында бир ненча айны къадалып хазырланнганма, альпинистле хайырланнган керекледе юйреннгенме, таулада жараула бардыргъанма. Хау, ёрлеу женгил тюйюлдю, алай Кавказ тауланы деменгилиликлерин кёрсенг, къыйналгъанынгы унутаса, - дегенди Магомет.

 Алай бла 5642 метр бийикликде Сотта улу Россейни ФССП-сыны байрагъын орнатханды. Магометни бу жетишими бла алгъышлай, энтта бийикликлеге жетерин тежейбиз.