Къол кётюрюу тынч, жарсыусуз ётер ючюн

 Быйыл 8 сентябрьде – къол кётюрюуню бирикдирилген кюнюнде – КъМР-ни Парламентини 7-чи чакъырылыууну депутатларын сайларыкъбыз. Ол магъаналы кюнде къол кётюрюу участкаланы от тюшюуден къоруулау жумушлагъа баш магъана бериледи. Бу ишге къутхарыучула бла айырыу участкаланы таматалары жууаплы болгъанларын билдиргендиле бизге КъМР-де От тюшюуге къажау-къутхарыу службадан.

 - От тюшюуге къажау жорукълагъа тийишлиликде, айырыу участкала, аланы тийрелери да таза болургъа керекдиле. Мекямгъа кирген эм чыкъгъан жерледе жукъ да жыяргъа, къаларгъа жарамайды. От ёчюлтюучю кран тийишлисича къуралыргъа, полда кюйюз учхаламазча чюй бла урулургъа керекди. Аны бла бирге участкала от ючюлтгенде хайырланнган затла бла жалчытылынадыла, ол санда огнетушительле бла, - деп билдиргендиле бизге ведомстводан.

Мекямны хар къатында кёрюннген жерде къоркъуулу болумда тышына элтген жолну сураты, къутхарыучуланы телефон номерлери орнатыладыла. Айырыу участкада бла аны тийресинде терк къабыныргъа боллукъ затланы асыраргъа жарамайды, дагъыда тютюн ичерге, кир-кипчикни кюйдюрюрге да эркин этилмейди. Айырыу участкада ишлегенле уа фонарикле бла жалчытылынадыла.

Алай битеу жорукълагъа да къарамай, айырыу участкада от тюшсе, биринчиден, къутхарыучуланы чакъырыргъа керекди: «01» телефон номерге сёлешип (мобильныйден «101» неда «112»).  От ачыкъ болса, къуру тютюн кёрюнсе да чакъырыладыла от ёчюлтюучюле. Ызы бла къоркъуулу болумну юсюнден айырыу участканы таматасына билдириледи, мекямда адамла тышына чыгъарыладыла. Ызы бла айырыу бюллетеньлени, урналаны, документлени да къутхарыргъа керекди.

От артыкъ уллу тюйюл эсе, аны ёчюлтюп башларгъа боллукъду. Бу кезиуде уа токну ёчюлтюрге, къутхарыу жумушха къатышханланы къоркъуусузлукъларын жалчытыргъа тийишлиди.

- Айырыу участкалада тынчлыкъ сакъланыр ючюн, от тюшюуге къажау жорукъланы толтурургъа керекди. Ол кезиуде къол кётюрюу бир тюрлю чырмаусуз, къайгъысыз ётерикди, - дегендиле ведомстводан ушакъны ахырында.