Кёллендирген эсепле эмда ахшы муратла

Элбрус районда озгъан шабат кюн билим бериуню келечилерини кезиулю август кенгешлери болгъанды. Тырныауузну Къулийланы Къайсын атлы маданият юйюнде да уллу байрам ётгенди. Жангыртылгъан мекямгъа кеслерин билим бериуге жоралагъанла, ёмюрлерин устазлыкъ бла байлагъанла жыйылгъандыла.

Кенгешни къонакълары КъМР-ни Правительствосуну Председатели Мусукланы Алий, Элбрус районну башчысыны борчун толтургъан Сотталаны Къурман, районну Билим бериу управлениясыны таматасы Атаккуланы Нуржан, жер-жерли самоуправленияланы депутатлары, эллени администрацияларыны таматалары,право сакълаучу органланы келечилери, районну мектеплерини таматалары, орунбасарлары эм устазлары болгъандыла.

Жыйылыуну устазны хурметине аталгъан назмула бла башланнган классланы сабийлери ачхандыла. Ызы бла сёзню Мусукланы Алийге бергендиле. Ол жыйылгъанланы жангы окъуу жылны башланыуу бла алгъышлагъанды. Озгъан жыллада районну билим бериу системасыны мюлк хазнасына уллу эс бурулгъанын, кёп сабий садларына бла школларына тынгылы ремонт этилгенин, бусагъатда да ол иш тири бардырылгъанын белгилегенди. Мындан ары да, къысха заманны ичинде ремонт керекли болуп, алыкъа этилирге жетишалмай тургъан учреждениялагъа тынгылы къараллыгъын айтханды. Миллет программаланы жашауда толтурууда Элбрус район алчыланы санында болгъанын черте, мында район башчыланы къыйынлары уллу болгъанын белгилегенди. Мюлк жаны бла жаланда мекямла жарашдырылып къалмай, саулай окъуу керекле, техника хазнаны да жангыртылгъанын айтханды. Алай, районну устазларыча, ишлерине саулай жюреги бла берилген профессионалла болмасала, ол жангырыуланы магъанасы къалмазлыгъын белгилегенди.

Билим бериуде уллу жетишимле болдургъанлары, жангы атламлагъа итиниулери ючюн да устазлагъа ыспас этгенди. Мындан ары да быллай бийик даражада, махтау ала ишлерлерин тежегенди.

Ызы бла сёз Сотталаны Къурманнга берилгенди. Ол районда билим бериуге къолларындан келгенича эс бурургъа кюрешгенлерин, салгъан къыйынларыны эсеплери аламат болгъанын айтханды. Билимли, жетишимли устазла жылны ичинде Россей даражада бардырылгъан эришиулеге, форумлагъа, вебинарлагъа да къатышып, жетишимли болгъанлары ючюн ёхтемленнгенин туура этгенди.

Атаккуланы Нуржан а кесини «Шёндюгюлю билим бериу: стратегиялы башламчылыкъладан шарт кёрюмдюлеге» деген докладында билим бериуню качествосун игилендириуню эм аны сабийлени бла жаш тёлюню арасында кимни да окъургъа онгу болурча амалла къурауну баш борчха салыннганын белгилегенди.

Кенгешни уллу концерт программа жарытханды.  Республиканы белгили артистлери Жангоразланы Мажит, Мамайланы Фатима, Ауэс Зеушев, «Таулан» ансамбль, Батырбийланы Махти, Джаппуланы Заира, Ёзденланы Танзиля, Гайыланы Тахир, «Салам» ансамбль жыйылгъанланы къууандыргъандыла. Кенгешни «Устаз» деген жыр бла бошагъандыла.

Темуккуланы Асият.
Поделиться: