Мектеплеге жолла тап болурча

КъМР-ни Транспорт эмда жол мюлк министерствосундан билдиргенлерича, «Къоркъуусуз эмда тынгылы автомобиль жолла» миллет проектге кёре бюгюнлюкде мектеплеге баргъан жолланы элли километр чакълы биринде тынгылы ремонт ишле барадыла.  

Аны баш магъанасы окъуучула къыйналмазча эм къоркъуусузлукълары жалчытылынырча этергеди. Ишлени кезиуюнде жолгъа жангы асфальт жайгъанларындан сора да, «зебраланы» жангыртадыла, тротуарланы болумларына къаралады, бордюрла, темир буруула, светофорла, жорукъланы билдирген белгиле, ызла салынадыла эм машинала сюелирча жерле къураладыла.

Быйыл Экинчи Чегемни Ленин атлы орамында юч мектеп бла эки сабий сад орналгъан жол жангыртылгъанды. Тёбен, Огъары Куркужин элледе да юч мектепге элтген жолну 18 километр чакълы кесегине къаралгъанды.   Аны бла бирге Терекское элде да мектеп бла сабий сад орналгъан жолда тийишли ишле тамамланнгандыла. Майскийде да 1-чи номерли гимназиягъа баргъан жол мардалагъа келиширча болгъанды. Бабугентде Мёчюланы Кязим атлы   орамны 1,4 километр тенгли бирине тынгылы къаралгъанды.  Мында спорт школ, садик да барды. Нальчикде да Шимал Кавказда эм уллу «Кюн шахар» сабий чыгъармачылыкъ академиягъа эм 27-чи номерли мектепге баргъан   2-чи Таман дивизияны орамында тийишли ишле бошала турадыла. Мусука улу, Казаноко Жабаги, Малкъар орамла да ишле бошалгъандыла. Алада мектепледен тышында, бир къауум сабий садла да бардыла.

Андан сора да, муниципалитетледе билим бериу учреждениялагъа берилген субсидиялагъа Нальчикде Профсоюз орамны 1,8 километрине тынгылы ремонт этилгенди. Ол шахарны «Восточный» микрорайонуну да 1500 окъуучугъа этилген шахарны эм уллу мектеплеринден бирине элтеди. Басханда жангы мектепге бла «Олимпийский» бульваргъа баргъан участок игилендирилгенди. Къашхатауда, Красносельское элде да мектепле сюелген жолла мардалагъа келиширча болгъандыла. 

КъМР-ни Транспорт эмда жол мюлк министерствосунда айтханларыча, мындан арысында билим бериу учреждениялагъа элтген жолла мардалагъа келиширча тынгылы ремонт ишле бардырыллыкъдыла.