Багъыу къыйматлы болурча

КъМР-ни Саулукъ сакълау министерствосундан билдиргенлерича, бу кюнледе «Саулукъ сакълау» миллет проектни «Биринчи медицина болушлукъ берген бёлюмню жангыртыу» программасына кёре, Нальчикни 2-чи номерли поликлиникасына тынгылы ремонт этип бошай турадыла.

Стационар борчун 1952 жылдан бери толтурады. Бюгюнлюкде ол эсепде болгъан 89 минг адамгъа къарайды. Аны кюндюз жатханлагъа багъарча 20 чакълы ундуругъу барды.

Бусагъатда ишлени кёбюсю тамамланнгандыла, жаланда кабинетледе бла бёлюмледе ууакъ-тюек жумушла бла кюрешедиле. Мебельни эм керекли оборудованияны да жерлерине тапдырадыла. Ол жангыртылгъандан сора «аяулу поликлиника» амал бла ишлерикди. Аны баш магъанасы – адамлагъа тап онгла къураргъады. Сёз ючюн, специалистлени къыйналмай табарча, жукъгъан ауруулары бла инсанла башхалагъа къатышмазча, кёп сакъларгъа тюшмезча эм башха мадарла этилликдиле.

КъМР-ни саулукъ сакълау министри Рустам Калибатов кёргенине бюсюрегенди эм бир-бир гитче кемчиликле бла байламлы эсгертиуле да этгенди.