Не затны юсюнден окъургъа сюерик эдигиз?

Информация технология, Интернет айныгъан кезиуде газетле, журналла магъаналарын тас эте барадыла, дерге боллукъду. Ол уллу жангылыуду, ашыгъышлы оюмду. Бютюнда сёз миллет тилледе чыкъгъан изданияланы юслеринден бара эсе. Аланы борчлары окъуучуларына бола тургъан ишлени юслеринден билдиргенинден тышында, ана тилни, аны сёз байлыгъын тазалай сакълауду, халкъны айтхылыкъ адамлары бла шагъырей этиудю. «Заман» газет да ол сыйлы борчну толтурургъа итинеди. Биз окъуучуларыбызны араларында ала газетни бетлеринде къаллай материалланы жаратханларыны, журналистлерибиз къаллай темаланы бегирек ачыкъласала сюйгенлерини юсюнден соруу бардыргъанбыз. Аны эсеплери бла шагъырей этерге сюебиз.

Музыка театрны солисти Гергъокъаланы Халимат оюм этгенден, газетибиз ишин не жаны бла да аламат бардырады. Ачыкъ айтханда, газет миллетни тарыхын, аны излемлерин, жарсыуларын бла къууанчлы кюнлерин суратлагъан, аны келлик тёлюлеге сакъларыкъ баш амалды. Мен ийнанама, сабийлерибиз, туудукъларыбыз, газетлени бир ауукъ заман алгъа чыкъгъан номерлерин ачып, бюгюннгю кюнню юсюнден кеслерине кёп жангы зат билликлерине. Анга шагъатлыкъны уа «Эски сурат» деген рубрика этеди, къалай хычыуунду миллет кийимле кийген ариу, назик къызларыбызгъа, жигит жашларыбызгъа, огъурлу ынналарыбызгъа бла аппаларыбызгъа къараргъа. Нени къошарыкъ эдинг, къалай материалла асламыракъ болсала игиди деген соруугъа жууап бере уа, мен юйюрлени, бютюнда жаш юйюрлени, белгили болмай, алай ишлеринде жетишимли, юлгюлю адамларыбызны юсюнден аслам жазылса сюерик эдим, жангы, умутландыргъан инсанланы юслеринден окъугъан не мутхуз кюнде да кёлюнгю кётюреди, дейди. 

КъМР-ни Культура министерствосуну бёлюмюню баш специалисти-эксперти Акъайланы Лейля да «Заман» газетни бек сюйюп окъугъанын билдиреди. Анда тарыхыбызны, тутхан ишлеринде атларын айтдыргъан инсанларыбызны юсюнден бир башха жерде табылмазлыкъ материалла басмаланнганлары ючюн газетни корреспондентлерине хурмет да этеди. Спортда, культурада, илмуда, башха сфералада жетишимли жашларыбызны, къызларыбызны юслеринден окъуй, айхайда жюрекден къууанады. Дагъыда, Ата журт урушха, башха къазауатлагъа къатышхан жигитлерибизни юсюнден статьяладыла, гитче миллетибизде ёхтемленирча, ёсе келген тёлюлеге юлгюге салырча къаллай бир инсан барды деп ёхтемленеди. «Жангыз да, мен акъсакъалларыбызны, аланы жашау жолларыны, юйюрлерини юсюнден кёбюрек окъургъа сюе эдим. Кёчгюнчюлюк тарыхыбызны бушуулу бети болгъанды. Жаш адамла, сабийле къыйынлыкъда адамлыкъларын тас этмеген ата-бабаларыбызны эсгергенлей турурча, киши жеринде къыйынлыкъ чегип, сынмай, бюгюлмей, туугъан жерине къайтып, жангыдан от жагъа тиргизген къартларыбызгъа кёбюрек эс бёлюнсе излейме. Сора, юриспруденция жаны бла материалла асламыракъ басмалансала, жамауатыбызны бу жаны бла билимин ёсдюрюрге себеплик этерик эди», – деп къошады Лейля.

Дзюдодан спортну устасы Гуппойланы Алина уа «Заман» газет заман бла тенг барады деп, таукел айтыргъа боллугъун чертеди. Анда басмаланнган материалланы жаратады, аланы кереклиге да санайды: «Нек дегенде, бусагъатдагъы жашауда инсан тёгерекде бола тургъан затланы билирге, ангыларгъа керекди, ол аны хар не жаны бла да айныууна уллу себепликди. Газетде уа политика, право, культура эм башха сферала толу суратланадыла. Ол неда бу тема артыкъды неда бу проблема уа аз тинтиледи, деп айталмайма. Мен дагъыда жаратханым, материалла асыры уллу болмагъанлай, къысха, алай теманы тынгылы ачыкълагъанларыды. Суратла тюрсюнлю болгъанлары да кёзге хычыуунду. Спорт жашаууму кесеги болгъаны, аны бек сюйгеним себепли, аслам эс бу жаны бла чыкъгъан материаллагъа бёлеме. Сёзсюз, спортчуланы юслеринден чыкъгъан статьяланы бегирек окъуйма, жашларыбызны бла къызларыбызны хорламлары гитчелеге да юлгюдю. Аланы юслеринден не къадар кёп жазылса, ол къадар игиди деп ойлайма».