Ахча саугъа бла белгиленирикдиле

КъМР-ни Башчысы Казбек Коков «Жылны устазы», «Жылны юйретиучюсю», «Жылны устасы», «Ана тилни бла адабиятны эм ахшы устазы» деген Битеуроссей конкурсланы регион даражалы урумларында хорлагъанлагъа бла призёрлагъа премияла бериу бла байламлы буйрукъгъа къол салгъанды. Алай бла республиканы оноучусуну аллай саугъаларына Яникойну мектебини ингилиз тилден устазы, Тёбен Къуркъужинде ючюнчю номерли школда тарыхдан бла обществознаниядан окъутхан Шамиль Успанов, Басхан шахар округну алтынчы номерли мектебинде орус тилден бла литературадан дерсле берген Альберт Карцаев тийишли болгъандыла. Ала «Жылны устазы» деген эришиуге къатышхан педагогладыла.

Андан сора да, саугъаланнганланы тизмесинде Нальчикни отуз алтынчы садигини юйретиучюсю Екатерина Доткулова да барды. Ол а «Жылны юйретиучюсю» атлы конкурсну алчысыды. Атажукинодан Залина Шогенова бла Шалушкадан Марианна Шокарова уа аны призёрларыдыла.

Дагъыда премиягъа КъМР-ни автомобиль-жол колледжинде окъутхан Ольга Труфанова тийишли болгъанды. Ол «Жылны устасы» деген эришиуде хорлагъанды. Бу конкурсда эки призёр да бардыла. Отарланы Сакинат Элбрус регион колледжде ишлейди. Ратмир Гонгапшев а «Къурулушчу» колледжде устады.

КъМР-ни Башчысыны премиясы бла бу жол ана тиллени устазлары да белгиленнгендиле. Аллай саугъа бу жаны бла регион даражада эм ахшыгъа саналгъан Жанна Жиляевагъа берилгенди. Бу эришиуде да призёрла экидиле. Мокъаланы Мадина Бабугентни мектебинде окъутады. Марина Бледных а Екатериноградская станицаданды.

Быллай премияла бла белгилеуню юсюнден оноу эм алгъа озгъан жылда этилген эди. Алай бла усталыкъ эришиуде хорлагъанлагъа – эки жюз минг, призёр даражагъа тийишли болгъанлагъа уа жюз минг сомла берилликдиле.