Къыралны чынтты инсанларыны къоркъуусузлукъларын жалчытхандыла

Запад къыралланы энчи службаларыны араларында бизни къыралгъа къажау сюелген тёре эрттеден бери келеди. Инсанларыбызны болмагъан даула бла терслеп, анда тутмакъда тутхан тёреге эртте айланнганды. Россейли энчи службалны келечилери да бош турмайдыла, къырал алагъа салгъан борчланы тийишлисича толтурадыла. Мындан алагъа къыралгъа къайтхан юйюрню сабийлери туугъанлы бери тыш къыралда жашагъандыла, аталары бла аналары тутмакъдан бош болуп Россейге къайтханда уа, билген этмегендиле ала россейлиле болгъанларын. Бюгюн сёз аланы юслеринденди. 

Россей Федерацияны бла запад къыралланы араларында иги кесек заманны ичинде бардырылгъан сёлешиулени хайырындан, бу кюнледе тутмакъланы алышыу бла байламлы магъаналы иш жетишимли бошалгъанды. Президентибизни пресс-секретары Дмитрий Песковну айтханына кёре, сёлешиуле ФСБ-ны бла ЦРУ-ну эм башха къыралланы энчи службаларыны араларында баргъандыла. Анкараны аэропортунда алышыу болгъандан сора, тыш къыралланы тюрмелеринден эркин этилгенлени самолёт бла Москвагъа жетдиргендиле. Къайтханланы араларында сегисизи россейлиледиле.

Алагъа аэропортда РФ-ни Президенти Владимир Путин тюбегенди. Ол аллай даражаны Россейге келген къырал башчыланы барысына да бермегенин белгилерге керекди. 

«Ата журтларына къайтханланы кёллерин кётюрюу бек магъаналыды. Хау, къырал башчы аллай эсни хар заманда да бёлмегенди тутмакъдан ычхыннганлагъа. Алай, бюгюнлюкде къырал ючюн жанларын аямай къуллукъ этгенлерин, кёп жылланы «жесирликде» да тургъанларын эсге алып, ма аны ючюн келгенди аэропортха», -дегенди Дмитрий Песков.

Россейге къайтханла бирге жыйылгъанларындан сора, Путин аланы Ата журтларына келгенлери бла алгъышлагъанды. Сора, артыкъда аскерчилеге саналгъанлагъа айланып, не къыйынлыкъ сынагъан эселе да, къыралгъа  къуллукъ этерге берген антларына кертичилей къалгъанларын энчи белгилегенди эмда юйлерине къайтханлары бла алгъышлагъанды. Дагъыда ол Ата журт аланы бир такъыйкъагъа да унутмагъанын, ала барысы да къырал саугъалагъа кёргюзтюллюклерин чертгенди, андан ары къадарларыны юсюнден сёлеширге да сёз бергенди.

Къайтханланы араларында Артём бла Анна Дульцевле болгъандыла. Ала Словенияда тасхачылыкъ ишни бардыргъанлары ючюн тутулгъандыла.    Владислав Клюшинни уа 2021 жылда Швейцарияда тутуп, Бирлешген Штатлада болгъан айырыулагъа къатышханса деп терслеген эдиле. Вадим Конощёнок 2022 жылда Эстонияда тутмакъгъа тюшгенди, бизни Сауутланнган Кючлерибизге микроэлектрониканы сатып алгъаны ючюн. Аны да Америкагъа ашыргъан эдиле, сюд этерге. 

Михаил Микушин Норвегияда, Павел Рубцов а Польшада тасхачылыкъ ишлени бардыргъанлары ючюн тутулгъан эдиле. Роман Селезнёвну америкалы энчи службала 10 жыл мындан алгъа Мальдивы айрыкамдан урлап кетип, ол къыралны компанияларына хакер бузукълукъла этгенсе деп, 27 жыл бергендиле.

Белгилеп айтырчады: къайытханланы араларында Германияны тюрмесинде битеу жашауун ётдюрюрге сюд этилген Вадим Соколов (Красиков) да болгъанды. Ол кёп жылланы энчи службаланы биринде къуллукъ этип тургъанды, кеси да самолётдан эм артда тюшгенди.  Красиковну тутмакъдан чыгъарыргъа кереклисини юсюнден къырал башчыбыз интервьюла берген кезиуде бир ненча кере айтхан эди. 

Белгили политолог Сергей Макаров кесини телеграм-каналында былай жазгъанды: «Къыйын болса да, Красиковну тутмакъдан чыгъарыу бла къырал россейлилени къайда да къорууламай къоймазлыгъын кёргюзтгенди». Дагъыда ол террорчулагъа иги эсгертиу этилгенин чертгенди.  Заман не къадар кёп ётсе да, террор иш бла кюрешгенлени аякъ тюплеринде от жанаргъа кереклисин белгилегенди. «Энди алагъа, алгъын заманладача, мында аманлыкъчы ишлерин этип, сора кеслерин «акъларгъа» Западха къачып, анда  энчи службаларыны этек тюплеринде бугъуп айланыргъа бир киши да къоярыкъ тюйюлдю», - дегенди. 

Эсигизге салайыкъ, Красиковну, террорист Зелимхан Хангошвилини 2019 жылда августда Берлинде ёлтюргенсе деп терслегендиле. Хангошвили, токъсанчы, жыйырманчы жыллада къыралда къаугъала болгъан кезиуде бир да болмагъанча кюйсюз башкесге саналгъанды. Къырал башчыбыз белгили америкалы журналист Такер Карлсоннга берген интервьюсунда аны юсюнден былай айтханды: «Чеченде уруш баргъанда, Хангошвили тутмакъгъа тюшген аскерчилерибизни жолгъа жатдырып, машина да аланы башлары бла ётюп тургъанды. Ма аллай жаныуар хали болгъанды, аны адамгъа санаргъа да жарамайды».

Дагъыда Путин Германияда бугъуп айланнган Хангошвили Москваны метрополитенинде болгъан уллу чачдырыулагъа къатышханын эм аны къоллары къаннга эртте боялып тургъанын билдирген эди. 

Американы президентини къоркъуусузлукъ жаны бла болушлукъчусу   Джейк Салливанны айтханына кёре, тутмакъла бла алышыуну юсюнден сёлешиуле бардырылгъанда, Красиков энчи магъананы тутханды. Алгъа Германияны канцлери Олаф Шольц аны эркин этерге унамай тургъанды. Болсада, Джо Байден анга сёлешгенден сора, бир кесек заман озуп, россейли  тасхачыны алай бошлагъандыла. Аны юсюнден «Политико» информация агентство жазгъанды.   

Энди уа кимлени къаллай инсанлагъа алышханларына бир къарайыкъ. Бизни къыралда сатхычлагъа (иноагент) саналгъанла Алсу Курмашева бла Владимир Кура-Мурза, Эван Гершкович Америкагъа ашырылгъандыла.  Ала бла бирге жолгъа тенгиз флотда къуллукъ этген аскерчи Пол Уилан да атланнганды. 

Тюрклю тасхачыланы билдирулерине кёре, битеу да бу алышыуда 26 адам болгъанды. Ала Россеийни, Американы Бирлешген Штатларыны, Германияны, Польшаны, Словенияны, Норвегияны эм Белоруссияны тюрмелеринде олтургъандыла. Путин кесини указы бла 13 адамны башына эркин этгенди.   Аланы ичинде кёп жылланы иноагент болуп, властьха къажау сюелип тургъан Алексей Навальныйни шуёхлары да бардыла.

Мен оюм этгеннге кёре, ол тышына ашырылгъанла бизни къыралгъа бир игилик да этмегендиле, мындан ары да этерик тюйюлдюле. Не заманда тыш къыралланы къуллары болургъа бек ышыкъ болуп жашагъандыла мында, ма аны ючюн къууанып сакълайдыла аланы. Тарыхдан билебиз, аллайла Россейден кетселе, ол бютюн кючлю эм деменгили болуучусун, аланы асламысыны къадарлары уа - жарсыулу.