Депутат кёргенине ыразы болгъанды

Кёп болмай РФ-ни Саулукъ сакълау жаны бла комитетини таматасы, Къырал Думаны 8-чи чакъырылыууну депутаты Бадма Башанкаев ишчи жолоучулугъуну чеклеринде Къабарты-Малкъарда болгъанды. КъМР-ни саулукъ сакълау министри Рустам Калибатов бла тюбешиуюнде «Саулукъ сакълау» миллет проектге кёре этилген жумушланы сюзгенди. Андан сора да, саулукъ сакълау бёлюмде оноу этиу бла къоркъуусузлукъ къалай къуралгъанларына эс бургъанды. 

Депутат республиканы Перинатал арасында да болгъанды, ол оборудование бла къалай жалчытылыннганына эс бургъанды. Бу ара Шимал-Кавказ федерал округда тынгылы эм къоркъуусуз медицина болушлукъ тапдыргъан биринчи учреждениягъа саналады. Мында ишни къурау жаны бла компетенция ара да ишлейди. Аны Къабарты-Малкъар СКФО-да биринчи болуп ачханын да энчи белгилерчады. Къонакъ аны иши бла да шагъырейленнгенди.    

Саулай алып айтханда, Бадма Башанкаев саулукъ сакълау бёлюмню ишине уллу багъа бичгенди. Ол санда медицина-санитар болушлукъгъа, диспансеризацияны бардырыугъа, жюрек-къан тамырла бла байламлы аурууладан багъыугъа тийишли халда эс бурулгъанына эм къагъанакъланы арасында ёлгенлени санын азыйтырча мадар этилгенине да бюсюрегенди. 

Ахырында Сыйлы къонакъланы китабында врачлагъа ишлерин тынгылы толтургъанлары ючюн ыспас этгенини, ала бла ёхтемленнгенини юсюнден жазгъанды, мындан арысында да ол жолдан таймай барырларын тежегенди.