Хар товар эсепге тюшерча

КъМР-ни сатыу-алыу- промышленный палатасыны келечилери Профсоюзланы юйлеринде «Белги салыу. Законда тюрлениуле» деген темагъа предпринимательле бла семинар бардыргъандыла.

Белгилисича, биринчи сентябрьден башлап, белги салыныргъа керекли товарланы тизмеси жети къауумгъа ёсерикди. Эки жыл мындан алгъа  жаланда онбир товар къауумну эсепге тюшюрюрге керек эди. Энди уа отуз бла тогъуз къауум киреди бу тизмеге. Бу жорукъну бузгъан предпринимательле административ эм уголовный жууапха тартыллыкъдыла.

Сатыу-алыу–промышленный палатаны башчысы Мурат Гукетлов бла «Сатыу-алыуда бирчалыкъ» профсоюзну башчысы Сергей Филин жыйылгъанлагъа законда тюрлениулени сылтауларын ангылатхандыла. «Жангы жорукъла бизни къыралыбызгъа келтирилген контрафактны азайтыргъа, эсепге тюшмеген сатыу–алыуну къурутургъа онгла ачадыла», - дегенди Мурат Гукетлов. Къырал адамлагъа не зат сатылгъанын билирге керекди. Уллу файда тюшюребиз деп, бир-бир предпринимательле адамланы саулукъларына заран  саладыла.

Семинаргъа онлайн халда Технологияланы айнытыу арасыны келечиси Данил Севастьянов да къошулгъанды. Аны айтханына кёре, маркировканы хайырындан телефонунда «Честный знак» приложениясы болгъан  хар адам  не зат сатып алгъанын билликди. Жарсыугъа, кийимни юсюнден айтханда, анга ётюрюк белгиле саладыла. Энди жангы закон аллай алдауну ачыкъ этип къоярыкъды.

Семинарда интернетни юсю бла сатыу-алыуну да тинтгендиле. Анда алданнганланы саны мингледен эртте озгъанды. Кёп заманны халкъны алдагъанла жууапха тартылмагъандыла. Энди болум тюрленирикди.