Сакъатлагъа къарагъанлагъа – себеплик

Келир жылдан башлап Россейде биринчи къауумгъа кирген сакъатланы эмда жыл санлары 80-ден атлагъанланы жумушларына къарагъан инсанлагъа компенсация тёлеуню бериу жорукълары тюрленирикдиле. Къабарты-Малкъарда МФЦ-дан билдиргенлерича, Социал фонд аллай адамланы пенсияларына 1200 сом къошарыкъды. Ол кеси да жыл сайын ёсе барлыкъды, пенсиялары бла бирге.

Шёндю къалай тёленеди?

Бюгюнлюкде 1200 сомну биринчи къауумгъа кирген сакъатланы эмда жыл санлары 80-ден атлагъанланы жумушларына къарагъан адамла аладыла. Бу тёлеуню аланы заявленияларын алып, ала къарарыкъ адам да шагъат этсе, алай бередиле. Ахча пенсия бла бирге келеди.

Энди уа къалай боллукъду?

Келир жыл биринчи январьдан башлап биринчи къауумгъа кирген сакъатлагъа эмда жыл санлары 80-ден атлагъанлагъа пенсияларына 1200 сомну Фонд алайлай къошуп тебирерикди. Башхача айтханда, энди ары-бери барып, заявление жазып айланыргъа, аллай пенсиячыны жумушларына да ким къарарыгъын билдирирге керек боллукъ тюйюлдю.

Сагъынылгъан къауумгъа кирген сакъатлагъа тёлеу бла да алай боллукъду: ахчаны аны пенсиясына къошуп алай берликдиле. Бу жорукъ сабийликден окъуна биринчи къауумгъа кирген сакъатлагъа къарагъан ата-аналагъа неда башха инсанлагъа жетмейди. Алагъа берилген тёлеу (10 минг сом) келир жыл да сакъланырыкъды, ол жорукъ тюрленирик тюйюлдю.

Абаданланы жумушларына къарагъанлагъа уа тёлеуню неллай бирге белгилеген эселе да, аллай бир заманны берликдиле. Келир жылда уа бу къауумлагъа жангыдан ахча бериу къаллыкъды.