Пилотсуз хауа аппаратланы къурауда къошумчулукъ изленеди

Кёп болмай Къабарты-Малкъар къырал университетде «Пилотсуз хауа аппаратланы къурауда регионну онглары эм къыйматлылыгъы» деген соруугъа аталып   сессия болгъанды. Анга Къабарты-Малкъарны таматалары, промышленностьну, университетни келечилери эм башхала да къатышхандыла. 

Тюбешиуде сагъынылгъан системаланы экономикагъа къыйматлыгъы, аны айнытырча илмуну, производствону жанындан тийишли атламла этилирге кереклиси, бюгюнлюкде сурамны толтурурча эм проект файдалы болурча соруулагъа къаралгъанды. 

Аны бла байламлы жыйылыуда юлгюге тюрлю-тюрлю проектле кёргюзтюлгендиле. Ала жашауда бардырылсала къыйматлы боллукъларына жыйылгъанланы эслерин бургъандыла.  

 КъМР-ни промышленность, энергетика эмда сатыу-алыу министрини орунбасары Эльдар Кяров бу жаны бла ишлеген экспертлеге теория эм практика жаны бла да болушлукъ тапдыргъанлары ючюн ыразылыгъын билдиргенди эм мындан арасында байламлыкъда ишлерге хазырлыкъларын белгилегенди.

- Бизни борчубуз уллуду – къыралда пилотсуз авиация системаны айнытыргъа керекбиз. Аны байламлы сизни бёлюмню мурдору бла шагъырей этерге эм бир къауум шартларын ачыкъларгъа излейбиз, - дегенди Пилотсуз авиация системаланы федерал арасыны таматасы Дмитрий Летунов.

Ол пилотсуз аппаратланы (БАС) ишини юсюнден хапарлагъанды. Ол санда аны къурамыны, къыралдан къаллай болушлукъ сакъларгъа кереклисин эм башха затланы юсюнден да тынгылы билдиргенди. Проектни магъаналы шартларындан бирине уа илму-производство араланы байламлыкъда ишлерге онг табыллыгъын санагъанды.

 - Бюгюн тюбешиуде Къабарты-Малкъарда илму-производство араны къурарча онг сюзюллюкдю. Аны къурамына, регионнга къыйматлыгъына да аслам эс буруллукъду. Сёз ючюн, юлгюге Москвада Руднев атлы индустриал паркда уллу НПЦ-ны келтирирге боллукъду. Мында тюрлю-тюрлю пилотсуз аппаратла жарашдырыладыла, жараулу болгъанларына шагъатлыкъны ётедиле эм серия халда чыгъарылырча онг бериледи, - деп къошханды эксперт.

Жыйылыугъа къатышханла пилотсуз аппаратла бюгюнлюкде къайсы бёлюмде хайырланнганларын, къаллай жумушланы толтургъанларын да билгендиле.

Къабарты-Малкъарны министерстволаны келечилери сагъынылгъан проектлени юлгюсюнде тийишли ишлени башларча онгланы эм тыйгъычланы юсюнден да билдиргендиле.

КъМКъУ-ну къыйматлы проектле жаны бла проректору Махийланы Танзиля пилотсуз аппаратланы хазырлауда вузну ахшы онглары болгъанын эсге салгъанды.

- Бу жаны бла бизни иги жетишимлерибиз барды дерчады. Жаш тёлюню арасында инженер къауумланы хазырлауда конкурсну жетишимли ётюп, билимли кадрланы чыгъарырча федерал болушлукъ тапханбыз. Аны себепли ала пилотсуз аппаратланы къурау жаны бла терк айный баргъан бёлюмде жерлерин табарчадыла. 

Тохтасуз билим бериу системагъа кёре онтогъуз федерал проектни эм миллет программаланы чеклеринде къыралны 64 субъектинден 73 минг адамны окъутургъа онг табылгъанды. Аны бла бирге регионну промышленный бёлюмюн айнытырча да мадар этилгенди.

Биз тамблагъы кюнюбюзню сагъышын этебиз, деп таукел айтырчады. Бусагъатда окъуна 3500 студент бла школчу къошакъ билим бериу халда программированияны жангы тюрлюсюне юйренедиле, - дегенди Махийланы Танзиля.