Эсепле чыгъаргъандыла, игилени саугъалагъандыла

     «Россейни предприниматель тиширыуларыны ассоциациясы" Битеуроссей жамауат организацияны Къабарты-Малкъарда регион бёлюмю ишини эсеплерин чыгъаргъанды. Анга аталгъан жыйылыу «Акрополь» арада бардырылгъанды. 
 Ишни башлай,  регион биригиуню башчысы Эфендиланы Рита «Бизнес-миссия-2018" деген федерал  пилот проект КъМР-де  жетишимли бардырылгъанын билдиргенди. Анга  къатышханлагъа эмда  аны тюрлю-тюрлю майданларында  ишлегенлеге бюсюреу къагъытла бергенди. Алагъа тийишли болгъанланы араларында КъМР-ни Башчысыны къуллугъун болжаллы халда толтургъан Казбек Коков, КъМР-ни Правительствосуну Председатели Мусукланы  Алий, предприниматель Хасан Карданов, "Синдика" къонакъ юйню баш директору Рашит

Кешоков, дагъыда башхала  бардыла.  Андан сора   Ставрополь крайдан келген къонакъ - "Юридическое партнёрство ФАКТ" ООО-ну баш  директору  Ольга  Шмитько - сёлешгенди эмда  жыйылгъанланы  сорууларына жууапла бергенди.   Къабарты-Малкъарда бизнес-миссияны юсюнден айта, ол республикада  туризм-рекреация онгланы юслеринден  билдириуле аз этилгенлерин эсгертгенди.
      Тюбешиуню кезиуюнде предприниматель тиширыула жылны ичинде тамамлагъан ишлерини юсюнден айтхандыла. "Бек иги спикер эмда оратор-эксперт" деген атха тийишли болгъан Эфендиланы Ритагъа  «Россейни предприниматель тиширыуларыны ассоциациясыны»  атындан  дипломну, бюсюреу письмону, энчи саугъаны да  Ольга Шмитько бергенди.

  Ахырында уа  лотерей билетле ойналгъандыла. Алада къытханла белгили тиширыу юристледен консультация алыргъа, косметика салоннга барыргъа, психологну болушлугъун хайырланыргъа да боллукъдула.