Жалгъан хумужу къаллайды?

Жалгъан продукцияны арасында сатыуда аслам тюбегени бла биринчи жерни сары жау алады. Ызы бла ачыгъан бишлакъ эм бишлакъ барадыла, дейдиле Россельхознадзорну КъМР-де Управлениясыны Референт арасында.

Жалгъан ачыгъан бишлакъны этгенле анга крахмал, битим жаула, тытыр неда сода къошуучудула. Аны керти сютден этилгенин билир ючюн, йод тамызыгъыз. Крахмал къошулгъанын къабып кёргенде билген къыйынды. Алай анга йодну тамдырып, ол тийген жер кёк бетли болса, анда крахмал болгъанын билигиз. Мор бет алса уа, ол керти бишлакъды.

Дагъыда башха амалла бардыла. Хумужуну отоуда ачыкъ жерде къоюгъуз. Ол саргъылдым болуп, юсю да къатса, анга абери къошулгъанына ийнаныгъыз. Ачыгъан ийис этип, татыуу да алай болгъан эсе уа, таза сютден этилгенди.

Бир-бир предприятиялада быллай ашха тюрлю-тюрлю битим (кокос, пальма) жаула къошаргъа ёч боладыла. Аллай затла бла этилгенин билирге сюе эсегиз, хумужуну бир кесегин табакъгъа салып, юсюне исси суу къуюгъуз. Тазасына бир зат боллукъ тюйюлдю, жалгъаны уа сууда эрип кетерикди.

Ачыкъ жерде къалгъан керти хумужу, ачыгъан этгенликге, тюрсюнюн тюрлендирлик тюйюлдю, битим жаула къошулгъаны уа сары боллукъду. Аны кесин да къабып кёрсегиз, ауузугъузда жау татыуу къаллыкъды. Ол да «пальма» къошулгъаныны белгисиди.

Тытыр неда сода къошулгъанын билир ючюн а, стаканны ючден бирин суу бла толтуруп, чай къашыкъ бла бир хумужуну анда эритигиз. Ызы бла уксусдан неда лимон суудан беш-алты тамычы тамдырыгъыз. Суу пысылдап башласа, анда сода неда тытыр болгъаны баямды.

Энтта да бир амал: ачыгъан бишлакъны исси табагъа салгъанда, аны хуппегиси аз-маз чыгъып, алайлай къалса, ол игиди. Эрип кетсе уа – жалгъан затды.