Алмаланы жыйып башлагъандыла

Къабарты-Малкъарны терек бахчаларында эртте бишген алманы бла кертмени жыйып башлагъандыла. Ала, кёп заманны сакъланыргъа жарамагъанлары ючюн, тюзюнлей сатыу-алыу точкалагъа жибериледиле. Жемишлени къышха асыраргъа жарарчаларын сентябрьни ахырында кетерип башларыкъдыла.

Белгилисича, республикада алма ёсген терек бахчала 27 минг гектардан аслам жерни аладыла. Былтыр жемишден бла наныкъдан 737 минг тонна тирлик жыйылгъанды. Орта эсеп бла алып айтханда, бир гектардан 386,3 центнер чыкъгъанды.

Эсге сала айтсакъ, бюгюнлюкде регион импортну алышындырыу программагъа кёре жемиш-наныкъ продукция бла башха субъектлени да жалчытады. Жыл сайын терек бахчалыкълагъа къошула барады. Аны бла бирге аланы сакъларча энчи комплексле да ишленедиле. Арт жыллада бай эм тынгылы тирлик алыргъа да онг табылгъанды. Аны баш сылтауларындан бири – кезиулю ишле болжалдан кеч къалмай тамамланнганлары, жангы технологияла эм тынгылы материалла да хайырланнганларынданды.