Жол мардалагъа келиширча

Бабугентде Мечиланы Кязим атлы жолну 1,4 километр чакълы бирине тынгылы ремонт этип бошай турадыла. Ол мектеп, сабий сад, спорт зал, амбулатория, агъач мюлкню бёлюмю орналгъан социал магъаналы объектди.

Бюгюнлюкде мында жауун эм черекден келген суу саркъырча арыкъла, быргъыла, бордюрла салып, жолну мурдорун кючлеп бошап, асфальт жайып башлагъандыла. Тротуарла да ишленнгендие эм кече жарыкъ болурча чыпынлагъа чыракълада салгъандыла. Баший улу орамда юч километр чакълы бирде жангыдан асфальт жайыллыкъды.
 Андан сора да, элде эм магъаналы учреждениягъа – 450 сабийге ишленнген мектепге – тынгылы ремонт этиледи. Ол 1950 жылда салыннгынды, болсада комплекс халда жангыртырча жумуш бириничи кере барады. Аны чеклеринде мектепни къабыргъаларындан къалгъанын саулай жангыртырыкъдыла.

Алгъаракъда къурулушчула аны башын жабып, терезелерин алышып, инженер коммуникацияларын тартып бошагъандыла. Бусагъатда ичинде сюртюу-бояу ишлери бла кюрешедиле.

Ол жангы оборудование эм мебель бла да жалчытылынныкъды. Алай бла окъуучуланы эм устазланы да болумлары игилендирилликди эм тынгылы билим алырча себеплик этерикди.

Планнга кёре мектеп келир жылдан кеч къалмай битерге керекди.