Инсанла 102 миллиард сом ёнкючге алгъандыла

Къабарты-Малкъарда жашагъанла алгъан кредитлени ёлчеми быйыл 1 июльда 102 миллиард сомдан атлагъанды, деп билдиргендиле РФ-ни Банкыны регионда бёлюмюнден.

Озгъан жыл бла тенглешдиргенде, бу кёрюмдю 26 процентден артыкъ къошханды. Ол санда абери сатып алыргъа берилген кредитле - 27,3 процентге (56,5 миллиард сом), ипотека уа кёп къалмай тёртден бирине (45,7 миллиард сом) кёбейгендиле.

Быйылны ал жарымында республикада инсанлагъа банкла 42 миллиард сом берген эдиле. Ол да былтырны кёрюмдюсюнден 36,4 процентге кёбюрек болгъанды. Абери сатып алыргъа сюйгенле 36 миллиард сом алгъандыла, неда, 2023 жылны биринчи жарымы бла тенглешдиргенде, 1,6 кереге кёп.

Ипотеканы юсюнден айтханда уа, быйыл былтырны биринчи жарымындан эсе 25 процентге аз кредит берилгенди. РФ-ни Банкында аны сылтауун ключевой ставка ёсюп, финанс учрежденияланы программалары багъаракъ болгъанларында кёредиле.

Ол ставка кётюрюлгени бла бирге вкладлагъа тёленнген процентле да къошхандыла. Аны себепли быйыл июльну биринчисине инсанла банклада тутхан ахчаны ёлчеми 61 миллиард сомдан атлагъанды.