Терк интернет - хар элге да

Россейни Цифралы айнытыу, связь эмда асламлы коммуникацияла министерствосуну 100-500 адам санлы эллеге интернет тартыу бла байламлы программасы барды. Аны хайырындан ахыр тёрт жылны ичинде кёп къалмай беш минг элде интернет ишлеп башлагъанды. Къабарты-Малкъарда уа былтыр Огъары Чегемде, Эл-Тюбюде, Залукодесде эмда Дженалда мадар этилгенди.

Къайсына интернет созаргъа кереклисин эллиле къол кётюргенлерине кёре биледиле. Сиз жашагъан жерде терк ишлеген интернет жокъ эсе, Госуслуги (https://www.gosuslugi.ru/inet) порталда оюмугъузну билдирирге боллукъсуз. Сюйсегиз а, министерствогъа письмо жазыгъыз. Аны адреси: 123112, Москва, Пресненская наб., 10, стр.2.

Письмода къуру кесигиз угъай, башхалагъа да къол салдырыргъа эркинсиз – аланы барын да тергерикдиле. Анда атыгъызны бла тукъум атыгъызны, тургъан жеригизни эмда интернетни къайсы элге созаргъа кереклисин жазыгъыз. Бу ишни быйыл 17 ноябрьге дери тамамларгъа керексиз, дегендиле КъМР-ни Цифралы айнытыу министерствосунда.