Ишинде – жууаплы, юйюрюнде – юлгюлю

Къыйын болумну юсюнден билдириу эм алгъа диспетчерге келеди. Къутхарыу ишни жетишимли бошалыры аны жууаплылыгъына, билимине, терк эм тюз оноу эталгъанына кёреди. Жангыз да бир минутну тас этиуню багъасы биреуню жашауу болургъа боллукъду.

МЧС-ни регионла бёлюмюнде ишлеген уста диспетчерледен бири Улбашланы Маринады. Ол бу усталыкъда 2004 жылдан бери урунады. Бу заманны ичинде Марина ишин теренинден билгенин, жууаплылыгъын, огъурлу адам болгъанын кёргюзтгенди. Халал жюрекли тиширыу бу усталыкъны сайлагъанына бир такъыйкъаны да сокъуранмагъанды, ишчи нёгерлерине юлгю, тенг да болалгъанды.     

Быллай жерледе уруннганла дайым да ачыгъанланы, къыйынлыкъланы кёргенлей тургъанлары ючюн ауур сезимлени жюреклерине жибермезге юйренирге керекди. «Ишинги терк тамамлагъандан сора, къыйынлыкъгъа тюшгеннге кёл этдире, психология болушлукъ берирге керексе. Апчыгъан кезиулеринде адамла тукъумларын бла къайда жашагъанларын окъуна унутургъа боллукъдула, башха магъаналы информацияны къойсакъ да. Аллай заманлада биз сёлешгенни жапсарыргъа, келген билдириуню тийишли жерге ётдюрюрге борчлубуз, аны барысына да уа талай такъыйкъа бериледи», - дейди ол.

Телефон зынгырдагъанлай, диспетчер не сорлугъун, айхай да, биледи. Бир-бирде уа сакъланмагъан, кюлкюлю кезиуле да чыгъадыла.

- Кюнлени биринде бизге мангал жана турады деп бир эр киши сёлешеди, - деп эсгереди Марина. – Да мангалда от болургъа керек тюйюлмюдю да деп соргъаныма ол айтханын жангыдан ашыгъышлы къайтарады. Артда тохташдыргъаныбызча, ол «Мангал» ашхананы юсюнден айта эди. От ёчюлтюучюле ары баргъандыла, насыпха, от уллу жерни алмагъан эди.

 Ишинде Маринаны салыннган борчланы тынгылы эм заманында тамамлай билгени, адеплиги, кертичилиги ючюн багъалайдыла. Ол саулукълу жашау бардырады, баскетбол бла волейбол ойнаргъа сюеди. Баш иеси бла къызлары Илана бла Алинаны ёсдюредиле. «Спорт бла кюрешиу саулугъуму кючлейди, арыгъанымы селейтеди, иш бла байламлы чыкъгъан ауур сезимлени женгиллендиреди, кюч-къарыуну сакъларгъа болушады. Сора жараула инсанны низамгъа, заманын тюз къурай билирге, жууаплылыкъгъа да юйретедиле», - деп белгилейди ол.

Ишинде жетишимлери ючюн Улбашланы Маринаны сураты МЧС-ни регионда Баш управлениясында махтау къангасына салыннганды.