Мектепле тынгылы жангыртыладыла

Черек районну администрациясыны башчысы Къулбайланы Алан КъМР-ни жарыкъландырыу эмда илму министри Анзор Езаов бла бирге мында мектеплени жангыртыу жаны бла регион программа жашауда къалай бардырылгъанына къарагъандыла. Къашхатауну, Бабугентни бла Зарагижни битеулю билим берген школларында эки жылны ичинде бошалыргъа деп белгиленнген тынгылы ремонтланы бюгюнлюкде къыстау баргъан кезиулериди.

Алай бла окъуу махкемеледе къурулуш ишлени бардырыуну  качествосуна  къаралып, аланы таматалары бла эмда ремонт бла байламлы жумушлагъа башчылыкъ этгенле бла аны кезиуюнде чыкъгъан жарсыуланы юслеринден сёлешиннгенди. Федерал бюджетден бёлюннен ырысхыгъа мекямланы ичлериндеги отоулагъа, ала бла бирге уа ашханалагъа, спорт заллагъа, подваллагъа да ремонт этиледи. Окъуу махкемеле барысы да жангы мебель, техника эмда дерсликле бла жалчытылынырыкъдыла.

Мектеплени мекямлары барысы да башхача ишленипдиле. Алай эсе да, аланы ичлерин бирге ушатхан а тынгылы къурулуш материалладыла. Андан сора да, ремонт ишле юч школда да бир кибик терк бардырыладыла.

Районда мектеплени мекямларын жангыртыу программагъа уллу эс бурулады – бютюнда аланы тийрелерин, чеклерин да тапландырыугъа. Къурулуш-монтаж ишлени къалай баргъанларына жууаплы министерстводан бла ведомстволадан тышында да, жамауатны келечилери, ата-анала, устазла, депутатла да къарайдыла. Аны себепли ремонтла бла байламлы ишле заманында бошалырларына эмда тынгылы этилирлерине эллиле, педагог къауумла, окъуучула да ышанадыла.