Арада байламлыкъланы кючлей

КъМКъУ-да Къабарты-Малкъарны Правительствосуну Сыйлы грамоталары бла Луганскны устазланы хазырлагъан къырал университетини ректору Жанна Марфинаны бла ЛГПУ-ну осуйлукъ этиу жаны бла советини башчысы Павел Пилавовну саугъалагъандыла. Андан сора да, ректорну къуллугъун толтургъан Юрий Альтудовха Луганск Халкъ Республиканы «ЛНР-ни халкъындан ыразылыкъ» деген сыйлы белгисин бергендиле.

- Университетде бизни эрттеден да шуёхларыбызны – Луганскны устазланы хазырлагъан бийик окъуу юйюню келечилерин – кёрюрге эмда саугъаларгъа ыразыбыз. Ала бла байламлыкъны алгъадан да жюрютебиз эмда жаш тёлюню юйретиуде бла билим бериуде асламысында бир кибик ызланы сайлайбыз. Андан тышында да, саулукъ сакълауну, эл мюлкню бёлюмлерин айнытыу жаны бла байламлыкъ жюрютюр муратдабыз. КъМР-ни Башчысы, бизни университет да СВО-гъа къатышханлагъа уллу себеплик этгенин белгилерге тийишлиди. Аланы арасында уа бизни преподавательлерибиз, студентлерибиз да бардыла. «Приоритет 2030» программаны чеклеринде окъуу юйюбюзге къырал оноучуланы жанындан этилген тутхучлулукъ ючюн да ыразыбыз, - дегенди Юрий Камбулатович, жыйылгъанланы алларында сёлеше.

Жанна Марфина да арада усталыкъ жаны бла байламлыкъны чертгенди. КъМКъУ-ну ректоруна бла устазларына аланы къыйын кезиулеринде болушлукълары ючюн ыспас этгенди. Ала жаланда къонакъланы университетлеринде окъутуу бла байламлы угъай, аны бла бирге саулайда ЛНР-ни билим бериуюн игилендириуге къошумчулукъ этгенлерин чертип, ыразылыгъын айтханды.

Къонакъланы Сыйлы грамотала бла саугъалай, КъМР-ни Башчысыны Администрациясыны таматасы Мухамед Кодзоков да окъуу юйлени арасынла он жылдан бери тохташдырылгъан байламлыкъла Луганск Халкъ Республиканы бла Къабарты-Малкъарны билим бериулерини ахшы жанына айнырларына себеплик этеригине ышаннганын билдиргенди.

ЛНР-ни Халкъ Советини депутаты Павел Пилавов а КъМКъУ-ну коллективине къошулгъан тийреледен сабийлеге эс буруп, къайгъыргъанлары ючюн ыспас этип, энчи аскер операциягъа къатышханла юйлерине жууукъ заманны ичинде сау-саламат хорлам бла къайтырларын тежегенди.

Юрий Альтудов ЛНР-де билим бериуге этген къошумчулугъу ючюн Луганск Халкъ Республиканы Башчысыны саугъасын алгъан биринчи лауреат болгъанын белгилерчады. Ол аны аллай белгиле тийишли кёргенлери эмда КъМКъУ-ну устаз къаууму бардыргъан ишге бийик даража бергенлери ючюн къонакълагъа ыспасын къатлап, арада биригиулюк мындан арысында да аслам ызны айныууна себеплик этеригине ийнаннганыны юсюнден хапарлагъанды.