Тыш къыраллагъа солургъа бара эсегиз

Ары тебирегенлеге Роспотребнадзорну Къабарты-Малкъарда бёлюмю къысха эсгертиу материал жарашдыргъанды.

Эм биринчиден, жукъгъан аурууланы профилактикасын сансыз этерге жарамайды. Барлыкъ жеригизде (къыралда) къаллай инфекцияла болуучусун билигиз, аланы эмда паразит аурууланы профилактика инструктажын ётмей къоймагъыз. Сары безгек болгъан къыраллагъа атланырдан эм азындан он кюн алгъа тийишли прививканы этигиз.

Болгъан жеригизде сууну жаланда тюкенледе шешалада сатылгъанын неда къайнатылгъанын хайырланыгъыз. Ашны иги бишгенин неда къууурулгъанын ашагъыз, бегирекда сиз билмеген затладан этилгенин. Кёгетлени эмда жемишлени биринчиден кран тюбюнде жууугъуз, ызы бла къайнар сууда чайкъагъыз. Азыкъ ашардан алгъа, къолларыгъызны сапын бла жууугъуз, сууда сюзерге сюе эсегиз а, бассейннге неда тийишли жерлеге барыгъыз.

Тышына чыкъгъанда, юсюгюзге ургъуйланы бла къурт-къумурсхаланы юркютген абериле себигиз, отоуда уа ала кирмезча терезелени аула бла жабыгъыз. Къурт-къумурсха къапханын эслегенлей, олсагъат врачха барыгъыз.