Наныкълагъа сурам ёсгенди

Быйылны ал жарымында «Магнит» тюкенледе наныкълагъа сурам, былтырны ол кезиую бла тенглешдиргенде, 1,6 кереге ёсгенди. Аны юсюнден бу сатыу-алыу сетьни пресс-арасындан билдиргендиле.

Сатылгъан орунчукъла бла тергегенде, барындан да кёп (эки кереге) кёкшуу къошханды. Дугъумгъа сурам а кёп къалмай жыйырма кереге ёсгенди. Ол бизни къыралда бахчала производствону айнытханлары себепли болгъанды. Дагъыда шимал жилекни (клюква) сатыу – 2,8, наныкъгъа уа 1,8 кереге кёбейгенди.

Июнь айда наныкъланы бар тюрлюлерине сурам 3,3 кереге асламыракъ болгъанды, кёкшуугъа уа тёрт кере окъуна къошханды. Озгъан айда да болум артыкъ тюрленмегенди; озгъан жылны бу кезиую бла тенглешдиргенде, наныкъланы бар тюрлюлерине сурам 1,8 кереге кёбюрек болгъанды. Тюкенде дагъыда чыгъана къасмакъ (облепиха), жимолость, такъюзюк (рябина), чум (кизил) эм башха тюрлю наныкъла бла жемишле чыгъып башлагъандыла.

Бу сатыу-алыу сеть быйыл кёп мюлкле бла байламлыкъла эмда келишимле къурай барады. Аны хайырындан сатыуда боллукъ наныкъ продукцияны тюрлюлери эмда ёлчеми да кёбейеди. РФ-ни Эл мюлк министерствосуну тергеулерине кёре, 2030 жылгъа Россей кесин быллай продукция бла экиден бирине жалчытырыкъды. Анга къырал берген болушлукъ, жангы бахчала къурала баргъанлары да къошумчулукъ этедиле. Бу жаны бла алчылагъа Краснодар эмда Ставрополь крайла, Къабарты-Малкъар, Кърым, Воронеж, Белгород, Волгоград эм Липецк областьла саналадыла.