Ток урлагъан тазир тёлейди

«Россети Шимал Кавказ» компанияны Къабарты-Малкъарда бёлюмю быйылны ал жарымында электрокюч урлау бла байламлы 95 шарт тохташдыргъанды. Барын да тергегенде, битеу да 3,9 миллион киловатт-сагъат ючюн тёленмегенди. Ахча бла санагъанда,  ол 15,1 миллион сомгъа жетеди, деп билдиргендиле «Каббалкэнерго» предприятияны пресс-службасындан.

Сагъынылгъан бузукълукъладан 88, ол - ток ызлагъа соргъан-сурагъан этмей къошулуу эмда счётчиклени ишлерин тюрлендириу эдиле. Башхача айтханда – урлау. Къалгъан сегизи уа электрокючню компания бла келишим этмей хайырланыу шартладыла.

Бузукълукъ этгенлени барына да энергетикле тийишли актла жазгъандыла; ала энди ол къоранчны къайтарыргъа керек боллукъдула.

Компанияда къайтарып эсгередиле: быллай затла бла кюрешиу административ жууаплылыкъгъа, аны юсю бла уа тазир тёлеуге келтирликди. Инсанлагъа аны ёлчеми 10-15, предприятиялагъа бла организациялагъа уа – 100-200 минг сомду. Къайтарып бузукълукъ этгенлени бохчалары уа 15-30 неда 200-300 минг сомгъа женгилирек боллукъду. Бир-бир шартла ючюн уголовный жууаплылыкъ да барды.