Жигит аскерчилерибизге дайым хурмет

Орус география обществону «Альтаир» жаш тёлю клубуну башчысы Мокъаланы Тенгиз билдиргенича, 2016 жылдан башлап ала жыл сайын Шау хуна ауушха чыкъгъанлай турадыла. Бу башламчылыкъларын жаш адамла Ата журтну къоруулаучуну кюнюн белгилеуню чегинде туугъан жерибизни къоруулай ёлген аскерчилени хурметлерине атайдыла. 

Быйыл да ала огъурлу ишлерин унутмагъандыла. Инал сырт таугъа ёрлеп, 2879 метр бийикликде 1942-1945 жыллада Кавказ ючюн уруш этген жигитлерибизни хурметлерине эсгериу къанганы салгъандыла. Тенгиз айтханыча, озгъан ёмюрню 70-чи жылларында «Турист» клубну пионерлери Кавказны къоруулагъанланы эсгертмесин орнатхан эдиле. «Былтыр а биз Ата журтну къоруулаучуну кюнюню аллында аллай эсгериу къангаланы Лха тауда, кюзде уа Алмалы къаяда салгъанбыз. Бу жолоучулугъубуз да жаш адамланы жюреклеринде, эслеринде да къалырына, ала кёп жылланы аны жылыулукъ бла эслерине тюшюре турурларына ышанабыз. Ала, Уллу Ата журт урушну къанлы къазауатларында Кавказ ючюн жан берген ата-бабаларыбызны жигитликлерине атап, къыйын хауа болумлада ауур эсгериу къангаланы тау башларына кётюргенлеге ыспас этерлерине ийнанабыз», - дегенди ол.

Жолоучулукъгъа башланнган турист хазырланыуну ётген, энчи снаряжениялары болгъан эм ханслы бла оюлургъа боллукъ тикледе барыуда юйрениуледе болгъанла сайланнгандыла. Аланы араларында «Альтаирни», Курортла эмда туризм, Табийгъат байлыкъла эмда экология министерстволаны, Къабарты-Малкъар къырал университетни келечилери да болгъандыла. Талайы бу ёрлеуден сора тау туристлеге да саналгъандыла.

Инал сыртны башына къауум Гижгит ауузну жанындан баргъанды. Боран ючюн жолну ахырына дери барыргъа онг чыкъмагъанды – машинала къаргъа батылып, аланы къазып чыгъарыргъа кёп къарыу къоратылгъанды. Болсада  кюнню халы аман тюйюл эди, аны хайырындан, къоркъуусузлукъну амалларын да жалчыта, жолоучула башына жетгендиле, эсгериу къанганы да орнатхандыла. Сора, эрттегили турист тёреде бола келгенича, алайда болгъанларыны юсюнден таугъа энди ёрлериклеге жазып къагъыт къойгъандыла.

Ёрлеуге чыгъаргъа себепликни Къабарты-Малкъарны Курортла эм туризм министерствосу, Россейни ФСБ-ны республиканы Чекчи управлениясы, «Къабарты-Малкъар» РИА информация агентство этгендиле.