Заманында тёлегенден игиси жокъду

Быйыл жылны биринчи жарымында «Россети Шимал Кавказ» - «Каббалкэнерго» заманында тёлеген абонентлени 98,4 процентин ток бла жалчытханды. Ол, былтыр бу заман бла тенглешдиргенде, 0,5 процентге кёпдю.

Эсге сала айтсакъ, эки айдан аслам тёлемеген абонент ток ыздан кесилирге боллукъду. Аллай адам ток бла жалчытылыныр ючюн, борчун толусунлай жабаргъа тюшерикди. Ол санда ток чыбыкъны кесгенлерине эм къошханларына да кеси тёлерикди. Аны ёлчеми объектни къыйынлыгъына кёре болады. Сёз ючюн, энчи арбазны иеси 3 минг, организацияны таматасы уа 10 минг сом берликди. Уголовный жууапха тартылгъанла уа РФ-ни Уголовный кодексини 165-чи статьясына тийишлиликде эки жылгъа тутулургъа боллукъдула.

 «Россети Шимал Кавказ» хайырланылгъан электрокючню багъасын келир айны онунчусуна дери тёлерге кереклисин къайтарып эсгертеди. Анда айтханларыча, эсеплеген приборда шартланы да ай сайын 23-25 кюнледе алагъа сёлешип, билдирирге керекди.

Жерине барып тёлерге сюйгенлеге уа хайырланыучуланы жумушларына къарагъан арала ишлейдиле. Ахчаны почтаны бёлюмлеринде кёчюрюрге да жарайды.

Бир тюрлю сылтау бла юйден чыгъалмагъан неда кеси барып, тёлерге онгу болмагъан бу жумушну «Свет онлайн» приложенияда, компанияны сайтында «Энчи кабинетде» (www.gp-lc.ru) неда «Сбербанк Онлайн» сервисде тамамларгъа боллукъду.

Токну багъасы заманында тёленмесе, компания аны кесип кетерге эркинди. Борчну уа сюдге жиберип, алай алыргъа боллукъдула.

Ток ючюн заманында этилген тёлеулени хайыры бла республиканы электрокюч бёлюмю ишин тынгылы бардырады, ол санда ток бла сылтаусуз жалчытырча эм аны качествосун ёсдюрюрча мадар этиледи.