Сынамлы фермерле болурча

Россельхозбанк бардыргъан «Фермерни школу» билим бериу проект бошалыргъа кёп къалмагъанды. Ол «Элли фермер мюлкге оноу этиу» программагъа кёре бардырылады эм 268 сагъатха созулады. Бу жол анга «Терек бахчалыкъ» бла «Сютлю малчылыкъ» усталыкъладан билимлерин эм сынамларын ёсдюрюрча 25 адам къытышханды.

Курсланы Къабарты-Малкъар аграр университетни профессорлары бла  доцентлери бардыргъандыла. Ол санда КъМР-ни эл мюлк министерствосуну финанс-экономика департаментини таматасы Алим Калмыков, министрни орунбасары, гитче эм орта предпринимательство эм конкуренция департаментни таматасы Ольга Белецкая, предпринимательлени информация-аналитика жаны бла жалчытыу бёлюмню башчысы Фатима Абазова, Россельхозбанкны микробизнесни клиентлери бла ишлеген менеджери Марьяна Алиева, «TRIZ Центр» консалтинг биригиуню оноучусу   Нурхани-Милана Махова.

Тынгылаучулагъа къошакъ профессионал билим бериу Институтну таматасыны орунбасары Зумакъулланы Фатима, информация-эсгертиу араны таматасы Руслан Урусов эм бёлюмлени деканлары да болушхандыла.

Сынамларын кючлерча, жаш адамла республиканы алчы эл мюлклеринде болгъандыла. Сёз ючюн, Залукокоажеде Аслан Жириковну сютчюлюк бла кюрешген элли фермер мюлкю аладан бириди. Ол ишини юсюнден толу хапар билдиргенди. Малла бла кюрешген тынч иш болмагъанын, кёп тыйгъычла тюберге тюшгенин да букъдурмагъанды. Ызы бла къонакълагъа экскурсия да бардыргъанды эм продукциясы бла сыйлагъанды. 

Андан сора да, Чегем районда «Шэджем» биригиуде болгъандыла. Анга Артур Шаваев башылыкъ этеди. Ол да мюлкюн, малла отлагъан жерлерин да кёргюзтгенди.

Прохладна   районда «Бахсан» биригиуню таматаларындан бири Вадим Чабан да коллегаларына жарыкъ бетден тюбегенди.  Ол 2019 жылда Молдавиядан  кёчюп келгенди. Экинчи жыл окъуна 41 гектарда терек бахча орнатханды. Ызы бла анга дагъыда 33 гектар къошханды. Быйыл биринчи бай тирлик жыярыкъды.

Мюлкде бийик технологиялы оборудование хайырланылады. Сынау халда эрик, тюклю шаптал, балли эм кертме терекле да салгъандыла. 

Ызы бла жаш фермерле Май муниципал районда белгили «Ленинцы» мюлкге келгендиле. Аны иши бла таматасы Владислав Русс шагъырей этгенди. Бюгюнлюкде ол республикада аты айтылгъан эл мюлк кооперативледен бириди. Кёп тюрлю зат бла кюрешеди, малчылыкъны, битимчиликни да бирча жетишимли бардырады. Продукцияны ёсдюргенден сора да, жарашдырып сатады. Аны хайыры бла танг кесек адамны иш бла жалчытыргъа онг табылады.  

Биригиуню экология жаны бла таза эм татымлы продукциясы Ново-Ивановское ат бла чыгъарылады. Ол бизни республикадан тышында да кенг белгилиди. 

Саулай алып айтханда, школну келечилери Урван, Чегем эм Басхан районлада мюлкледе да болгъандыла.

Курсла келир айны бешисинде бошаллыкъдыла. Ол кюн бизнес-планларын жетишимли къоруулагъанлагъа диплом берилликди. Аны бирге ала ишлерин башларча грант алыргъа онглары да боллукъду.