Ахчаны кёбейтиуню жангы амалы

Адамны не аз ахча къыстырыгъы болсада, аны кёбейтгенни хатасы жокъду. Келир жыл биринчи июльдан сора, бизни къыралда социал банк счётла бла социал вкладла ишлеп башларыкъдыла. Алада 50 минг сомгъа дери тутаргъа жарарыкъды. Тийишли законнга (№ 202-ФЗ) Президент Владимир Путин кёп болмай къол салгъанды.

Ким ачаллыкъды аланы?

Социал болушлукъ алгъан инсанлагъа ол берилгенини юсюнден «Единая централизованная цифровая платформа в социальной сфере» системада жазылыргъа керекди. Бир адамгъа бир вклад неда счёт ачаргъа къоярыкъдыла.

Мардасы

Социал вкладны  мардасы 50 минг сом бла чекленеди. Ахчаны бир кесегин тешерге неда аны юсюне къошаргъа жарарыкъды. Не зат этсе да,  проценти ставкасы тюрленирик тюйюлдю – инсанлагъа ол банкда не къадар тёлене эсе, ол ёлчемде сакъланып турлукъду.

Процент ахчаны ай сайын тёлерикдиле.

Вкладны болжалы бир жылды. Инсан социал болушлукъгъа тийишли болуп турса, аны андан ары созаргъа боллукъду.

Къаллай бир къошулады

Энтта да бир льготалы банк продукт барды - социал счёт.

Анда сакъланнган ахчагъа быллай процентле тёленирикдиле:

- 50 минг сомгъа дери эсе – Россейни Банкы тохташдыргъан ключевой ставканы эм азындан экиден бири тенгли;

- ол 50 минг сомдан кёп эсе – социал счётну келишиминде жазылгъан ставка тенгли.

Анга салгъан неда андан тешген ахчаны мардасы бир айны ичинде жыйырма минг сомдан озмаса, быллай счётну жарашдыргъанлары ючюн банкла тёлеу тыярыкъ тюйюлдюле.

Къайда ачаргъа боллукъду?

Келир жыл 1 июльдан сора быллай вкладланы бла счётланы эм уллу банкла ачып тебирерикдиле. Аланы тизмесин Россейни Банкыны сайтында табарыкъсыз. Къалгъан финанс организациялада уа ала 2027 жылны аллында чыгъарыкъдыла.

Дагъыда бир амал: быллай вкладны бла счётну «Госуслуги» порталда ачаргъа боллукъду.