Буз къала кёк отлукъ бла жалчытынырыкъды

«Газпром газораспределение Нальчик» компанияны специалистлери шёндю Нальчикде Вольный Ауул микрорайонда ишлене тургъан Буз къаланы котельнясына газ тартхандыла. Аны этер ючюн, отузметрлик быргъы орнатыргъа тюшгенди, - дегендиле компанияда.

Эсигизге салайыкъ: Къабарты-Малкъарда биринчи Буз къала «Демография» миллет проектни чеклеринде ишлене турады. Ол эки къатлыды, кеси да тёрт минг квадрат метр жерни алады. Ичинде буз майданы, фитнес бла кюреширча эмда жараула этерча отоулары, эришиуле бардырырча тийреси да боллукъду. Буз майданда жюз адам, трибунада уа юч жюз къараучу сыйынырыкъды. Объект быйылны ахырында хайырланыргъа берилликди.

«Буз къала газ бла жалчытылыннганы себепли аны ичинде тап болум къураллыкъды. Айтханларына кёре, бу объектледе республикалы эмда регионла аралы эришиуле да бардыра турургъа дейдиле», - деп чертгенди Газпром предприятияны башчысы Залим Вороков.