Нальчик ючюн къол кётюрейик

Нальчик «Маданият ара шахар – 2026» атны алыргъа тийишли шахарланы санына киргенди, деп билдиредиле республиканы Курортла эм туризм министерствосундан.

Конкурсда хорлам шахаргъа туристлени эм инвесторланы жанындан сейирни ёсдюрлюкдю. Нальчикни уа биринчи болургъа битеу онглары барды: бай тарыхы эм маданияты бла шагъырейлендирген ариу мекямлары, абаданла, сабийле да солурча кёп айбат жери, музейлери, театрлары. Мында жашагъанлагъа, къонакълагъа да аслам концерт, сахна оюнла, чыгъармачылыкъ ингирле къураладыла. Хар инсан да жюреги тартхан бир зат бла кюрешаллыкъды.

Эм иги маданият шахар жамауатны къол кётюрюуюне эм экспертлени багъа бичиулерине кёре сайланырыкъды. Биринчисине хар сюйген къатышаллыкъды, жангыз да къырал жумушланы порталында эсепге тюшерге керекди. Экспертле уа оноуларын шахарда маданият жашау къаллай бирге бай эм сейир болгъанына кёре чыгъарлыкъдыла.

Алай бла хар инсанны сайлау этерге чакъырабыз, аны ючюн къырал жумушланы порталында энчи кабинетинде сайлау баргъан бетге кирирге эм тизмеде шахарладан сюйгенигизни сайларгъа керекди. Бу жумушну 2024 жылны 1 декабрине дери толтурургъа тийишлиди.