Медицина кир-кипчикни кетериуде – жангы жорукъла

Къырал Думаны Экология, табийгъат байлыкъла эм къудуретни сакълау жаны бла комитетинде медицина кир-кипчикни къурутууну юсюнден законопроектни тинтгендиле, анга тюрлениуле кийирирге оноу этгендиле. Законопроектни экинчи окъулуууна хазырланыу он айны баргъанды, ол заманны ичинде кёп тюрлю соруулагъа къаралгъанды. Аланы Россейни Федерация Совети эм Правительствосу къабыл кёргендиле, деп билдириледи комитетни телеграм-каналында.

Комитетни башчысы Дмитрий Кобылкин бу сорууну магъаналылыгъын белгилегенди. «Мени социал сетьлеримде бардырылгъан соруу ачыкълагъаныча, адамланы элли процентден асламысы жашагъан регионларында медицина кир-кипчик къалай къурутулгъанын неда билмейдиле, неда бу жаны бла жарсыу болмагъан сунадыла», - дегенди.

Болсада жыл сайын къыралда юч миллион тонна чакълы медицина багуш жыйылады. Аны жетмиш процентден асламы, къаты коммунал багушча, «А» къауумгъа киредиле. Къоркъуулугъа эм бек къоркъулуугъа жыйырма беш проценти саналады. Тохташдырылгъаныча, аланы къауум-къауум этиу эм эсеплеу жангыз да медицина учрежденияланы кеслеринде бардырылады. Ала больницаланы тийрелеринден чыгъарылгъанлай, къайры элтилгенлерини эм къалай къурутулгъанларыны юсюнден информация асламысында тас болуп къалады.

Бу законну кийириу медицина багушну битеу тюрлюлерин тергерге, аланы къурутууну да эсепде тутаргъа онг берликди. Информация система да къуралырыкъды, алай бла хар килограмм къурутулгъунчугъа дери эсепде боллукъду. Эм къоркъуулу «Г» къауумгъа кирген кир-кипчик федерал оператор – Росатомгъа ётдюрюллюкдю, регионлада уа медицина багушну кетериу бла кюрешген битеу организацияла ишлерини юсюнден энчи реестрде билдирликдиле.