Нальчикде кёлде эр киши батханды

Россейни МЧС-ни Къабарты-Малкъарда Баш управлениясындан билдиргенлерине кёре, алагъа 23 июльда 02:37 сагъатда «Трек» кёлде эр киши батханыны юсюнден билдириу келгенди. Къутхарыучула мычымай ары атланнгандыла. 05:17 сагъатда ала батханны тапхандыла. Ведомстводан белгилегенлерича, анда жюзерге жангызда катамаранлада, катерледе бла къайыкълада эркин этиледи. 

МЧС солугъанланы жангызда эркин этилген жерледе жууунургъа чакъырады - алада къутхарыучула ишлейдиле, ачыгъаннга терк жеталлыкъдыла. Жер-жерли управленияда эсгертгенлерича, жюзгенде, бурууладан ары бармагъыз, сууда болгъаныгъызда бир бирни сермеп ойнамагъыз. Танымагъан жерлеригизде суугъа бийикден секирмегиз, кеф болуп тургъанлай, суугъа ахырысы бла да кирмегиз. Узакъгъа жюзюу, сууда кёп туруу санланы къурушдурургъа боллукъду, асыры бек арысагъыз, артха жеталмазыгъызгъа къоркъуу да чыгъады, бютюнда уа сууукъ сууда. Солургъа сабийле бла баргъан эсегиз, ала туурадан кетмесинле. Бу жорукъланы толтуруу палахдан сакъларыкъды, хар инсанны къоркъуусузлугъу, эм алгъа, аны кесини къолундады.

Болушлукъну 112 телефоннга сёлешип чакъырыргъа боллукъду.