Тогъуз районда – от тюшюуге энчи низам

МЧС-ни регионда Баш управлениясындан билдиргенлерича, Къабарты-Малкъарны шимал-кюнчыгъыш кесегинде от тюшюуге къоркъуу бешинчи классха жетгенди. Ол жауунла жаумагъанлары, хауа исси болгъаны ючюндю. Анга кёре Басхан эм Прохладный шахар округлада, Чегем, Урвань, Май, Прохладна, Зольский, Басхан эм Терк районлада от тюшюуге хазырлылыкъда туруу бла байламлы энчи низам кийирилгенди.

 Энчи низамгъа тийишлиликде айтылгъан районлада от тиргизирге, кир-кипчикни, къауданны кюйдюрюрге, эллени, агъачланы тийрелеринде, мюлкледе от тюшюуге келтирирге боллукъ бир тюрлю жумушланы толтурургъа эркин этилмейди. Жер-жерли самоуправление органлагъа да  къоркъуусузлукъну сакъларча къошакъ мадарла этерге буюрулгъанды.

Жорукъланы бузгъанла административ жууапха тартыллыкъдыла, тазир тёлерикдиле:

- инсанла: 10-20 минг сом;

- къуллукъчула: 30-60 минг сом;

- энчи предпринимательле: 60-80 минг сом;

- организацияла – 400-800 минг сом.

Жорукъла толтурулмагъанлайын къыйын болум чыкъса, Россейни законодательствосуна тийишлиликде уголовный иш ачыллыкъды.