Аналагъа - себеплик

Сабийден ауурлулугъу болгъан тиширыугъа къырал эм муниципал саулукъ сакълау учреждениялада сабий сакълагъан эм тапхан кезиуюнде медицина жумушланы хакъсыз алыргъа, медицина учрежденияны сайларгъа  эркинлик берген документге сабий туугъанда берилген сертификат дейдиле.  2021 жылны 1 июлюндан башлап ол жангызда электрон халда толтурулады, анга керекли кёрюмдюле бир информация системада сакъланадыла эм Социал фондха жибериледиле. Сертификатны ана жашагъан жерине кёре тиширыу консультациягъа биринчи кере барып, паспортун, борчлу халда медицина страхование полисин бла СНИЛС-ни кёргюзтгенинден сора врачла жарашдырадыла. Тиширыу консультацияда аны ачмагъан эселе, бу жумушну роддомда неда сабий поликлиникада тамамлайдыла.

Бу сертификатдан ахча алынмайды, ол медицина учрежденияланы счётларына жибериледи. Электрон сертификатла эм аланы жарашдырыу бла байламлы сорууланы регионда контакт-арагъа сёлешип берирге боллукъду, аны номери: 8-800-200-06-70. Былтыр Россейни Социал фондуну Къабарты-Малкъарда бёлюмю сабий туугъаны бла байламлы сертификатлагъа кёре 9128 тиширыугъа тёлеуле этгенди. Ол мурат бла сабийден ауурлукълары болгъанда эм бала тапханда къарагъан медицина организациялагъа 88 миллиондан аслам сом жиберилгенди.