Абаданланы къалай алдатадыла

Россейни Социал фондуну Къабарты-Малкъарда бёлюмю республиканы жамауатын аманлыкъчылагъа алданмазгъа чакъырады. Фондда эсгертгенлерича, хыйлачыла, ётюрюк айтып, ахча урлауну жангы амалларын дайым къурагъанлай турадыла, осал ишлеринде уа ала асламысында абадан жыл санда адамланы излейдиле.

Аманлыкъчыла къалай бла алдайдыла:

- социал сетьледе бла мессенджерледе Социал фонд, Налог служба бла социал къоруулау бёлюмле пенсиячыланы тинтедиле деген ётюрюк билдириуле жаядыла;

- фондну ишчилерибиз деп, абадан адамла жашагъан фатарлагъа барып, ала пропискаларына кёре жашагъанларына бла къалгъанларына къарайдыла. Ол регистрация этилмеген жеринде турмай эсе, тёлеулерин саулай да неда аны кесеклерин тыярыкъбыз, аны бла къалмай жууапха тартырыкъбыз, ол санда уголовный халда да, дейдиле;

- инсан пенсияны, пособияны неда башха тёлеуню алгъанын бла къалгъанын сурашдырадыла эм бир тюрлю сылтау бла фондха жибередиле;

- хыйлачы юристле абаданлагъа ахча тёлерге керекли жумушланы алдырадыла. Аланы жалгъан тинтиуледен сакъларгъа, официал органла бла чыкъгъан «проблемланы» тамамларгъа болушургъа, пенсияларын жангыдан тергетип кёбейтирге айтадыла.

Быллай болумла чыгъа тургъанлары бла байламлы Социал фонд, адамланы аманлыкъчылагъа ышанмазгъа чакъырып, аны ишчилери юйлеге бла фатарлагъа тинтиуле бла неда халкъны оюмун сорабыз деп бир заманда да бармагъанларын эсгертеди. Сизге биреулен келип, фондну ишчисиме дей эсе, аллыгъызда аманлыкъчы болгъанын билигиз. Андан сора да, пособияланы юслери бла файда келтирирге айтханлагъа ийнанмагъыз, тёлерге керекли жумушла бла хайырланмагъыз. Пенсияланы эм пособияланы тергеу бла байламлы битеу информацияны фондну кесинде неда МФЦ-лада хакъсыз алыргъа боллукъду. Пенсияла, сабий пособияла, социал тёлеуле бла байламлы соруула бла хакъсыз федерал телефон номерге 8-800-200-06-70 сёлеширге жарайды. Алай адамны энчи кёрюмдюлери бла байламлы хапар керек эсе, фондну жер-жерли бёлюмюне барыргъа неда аны электрон приёмныйине - sfrkbr@07.sfr.gov.ru жазаргъа, сора къырал жумушланы порталы бла хайырланыргъа эркин этиледи. Фондну регионда бёлюмю тамамлагъан жумушланы толу тизмеси уа аны сайтында - https://sfr.gov.ru/branches/kbr/ берилипди.