Хорламны татыуун, къытдырыуну ачыуун да сезерге юйрене

 Инсанны тюз, ариу ниетледе ёсдюрюуде, къарыулу этиуде спорт уллу магъананы тутады. Гитчеликден жарау этдириу, эришиулеге къатышдырыу сабийлени муратларына жетиуде къаты болургъа, шуёхлукъ жюрютюрге юйретедиле. Эки къарындаш – Малкъондуланы Имран бла Элдар республиканы Спорт министерствосуну спортну Олимпиадагъа кирмеген тюрлюлеринден «Спарта» клубуна жюрюйдюле, анда тренер Аслан Шогеновда кудогъа юйренедиле. Бери биринчи жарауларына жашчыкъланы аталарыны къарындашы Аппаланы Марат келтирген эди, ала да залны, сермешлени да жаратхандыла. Сабийлени аталары Альберт бла аналары Ира уланларыны спортха сюймекликлерине къууаннгандыла, эришиуледе биргелерине боладыла, кёл этдиредиле. Юйюр Звёздныйде жашайды. Тамата къарындаш Имран бешинчи классны окъуучусуду, жараугъа юч жылны жюрюйдю, кичи къарындаш Элдар а экинчи классдады, спорт бла бир бла жарым жылны кюрешеди.

Кудону уа ала ол единоборстволаны энди айный башлагъан, жангы тюрлюсю болгъаны ючюн сайлагъандыла. Анга каратеден, тайский эм европалы боксдан, джиу-джитсудан бла кикбоксингден приёмла киредиле. Сермешледе жорукъла къатыдыла, аны бла бирге ала керти тюйюшге ушайдыла, сора, хар шарт единоборстволаныча, кудону да философиясы терен магъаналыды. Аны мурдорун Адзума Такаши салгъанды, Россейде уа ол официал халда 2017 жылдан бери барды.

Алай бла кудо тынч спорт тюйюлдю, аны бла кюрешген тутуша, сермеше да билирге керекди. Къарындашла да, аны энчиликлерине тюшюне, бир ауукъ заман жарау этгенлеринден сора, эришиулеге къатышып, республикада, андан тышында да хорлап тебирегендиле. Эм магъаналы, алгъа барыргъа бютюн кёллендирген хорламларына ала экиси да биринчи эришиулеринде жетишимлерин санайдыла. Имран биринчи эришиуюне – Аскер искусстволадан шимал-кавказ студент оюнлагъа - экинчи классда болгъанында къатышхан эди, анда «кюмюшню» къытханды. Элдар а турнирледе кесин биринчи классда окъугъанында «Энгельс» эм «Нальчик» командаланы араларында матч тюбешиулеринде сынагъанды, анда биринчи жерни да алгъанды, экинчи быллай эришиуде уа ала экиси да чемпион атлагъа тийишли болгъандыла.

Жашчыкъла каратени бир тюрлюсюнде да сынашхандыла, юлгюге былтыр Владикавказда «Мамыр Кавказ» чакъырыу бла ётдюрюлген эришиуден Имран - «кюмюшню», Элдар а «алтынны» келтиргендиле. Саратов областьны Энгельс шахарында джиу-джитсудан экиси да биринчи жерлени алып къайтхандыла, Элдар анда эм иги техникасы ючюн кубок бла энчи да саугъаланнганды. Къарындашла «Элбрусну кубогунда» да алчыланы санына киргендиле, каратени зендокай будо эм араши тюрлюлеринден регионла аралы эришиуде да жетишимлери бла къууандыргъандыла, анда «Спарта» битеукоманда эсепде биринчи жерге да чыкъгъандыла. Имран а дагъыда единоборстволаны «Кобра» клубуну 9-жыллыгъына аталгъан турнирде хорлагъанды. Ызы бла «Элбрусну кубогуну» «Спорт наркотиклеге» къажауду деген чакъырыу бла ётдюрюлген бёлюмюнде Элдар «алтыннга», Имран а «доммакъгъа» тийишли болгъандыла.  

Хар спортчуча, Имран бла Элдар да эришиуню аллында жарсыйдыла, андан къутулургъа жарау, тренерлери тюз сёз таба билгени болушадыла. Юлгю уа жашчыкъла тренерлери бла белгили гёжеф Хабиб Нурмагомедовдан аладыла, аны сермешлерине къарай, ол хайырланнган техникалагъа бла приёмлагъа юйренедиле. Окъуудан бла кудодан бош заманларында Имран бла Элдар футбол ойнайдыла, миллет тепсеулеге юйренедиле.  Кёп айтхылыкъ спортчу хорламларын жууукъларына, жерлерине атаучудула. Имран бла Элдар аллай сагъышла этерге алыкъа гитчедиле, болсада, аналарыны аммасы Ахкёбекланы Любаны (жаннетли болсун) эсгергенлей, соргъанлай турадыла, унутмайдыла. Аналары Ира айтханыча, ол туудугъуну сабийлери бла, аланы жетишимлерин кёре, ёхтемленирик эди.

Татамиге чыгъар ючюн, инсан чыныгъыргъа, къарыулу болургъа керекди, ол да уллу хорламды. Жашчыкъла да эришиулеге къатышыргъа онг чыкъса, къууанадыла. Къытдырыргъа тюшсе, мугураймайдыла, тренерлери бла къайда къаллай халат жибергенлерин тинтедиле, жарауда аны къайтармазгъа юйренедиле. Аталары бла аналары да хар заманда да жанларында турадыла. «Спортда инсан хорламны татыуун, къытдырыуну ачыуун да сезип ангыларгъа керекди. Бу эки болумда да адам даражасын тюшюрмезге тийишлиди», - деп юйретеди жашларын Альберт.        

Алда уа жаш спортчуланы жангы эришиуле сакълайдыла: Минеральные Водыде къол тюйюшден бла Ставрополь крайда кудодан турнирле. Имран бла Элдар алагъа къыстау хазырланадыла. Аладан сора уа, жай жарау этиу-юйрениу жыйылыулагъа барлыкъдыла, алада эки ыйыкъны ичинде таулада лагерьде юйренирикдиле.