Хунерли жаш тёлюге – энчи къала

Жаш адамлагъа деп Къабарты-Малкъарны ара шахарында къала ишлене турады. Ол бек уллу (20 минг квадрат метрлик), тынгылы объект болургъа ушайды. Анда эки сахна зал ишлерикди: биринде – 785, экинчисинде уа 180 къараучугъа жерлери бла.

Шёндю къурулушчула мекямны къабыргъаларын жылыуну тутхан материалла бла тышлай турадыла, ичинде уа сюртюу-бояу ишле бла кюрешедиле эмда мермер плитканы саладыла. Башха къауум а электрокюч ызланы тартады, хауаны тазалагъан эмда салкъын этген, жылыу бла жалчытхан, сора дагъыда от тюшгенни юсюнден билдирген системаны да орнатады.

Бу къала хазыр болса, анда тюрлю-тюрлю жумушла тындырыргъа боллукъду: спектакльле, концертле, жамауат-политика форумла, республикалы эмда регион даражалы жыйылыула да. Объектни къурулушу быйылны ахырында бошаллыкъды, деп билдиргендиле КъМР-ни Къурулуш эмда жашау журт-коммунал мюлк министерствосундан.