Ышаныулукъ берген кёрюмдюле

 2024 жылны экинчи жарымына жазылыу кампания бошалды. Аны эсеплери арт эки жылдача игидиле. Сёз ючюн, озгъан кезиуде «Заманны» 1752 юйюр алып тургъан эсе, келир алты айда газетибизге 1709 адам жазылгъанды. Былай къарагъанда, кёрюмдю бир кесек аз болгъанлыкъгъа, «Кабардино-Балкарская правда» эм «Адыгэ псалъэ» республикалы изданияла бла тенглешдиргенде, ана тилибизде чыкъгъан жангыз газетибизге орта эсеп бла айтханда, 350 юйюр аладан эсе кёп жаздыргъанды.

Бюгюнлюкде редакцияда ишлегенлеге газетибизни тиражын ёсдюрюу бек уллу жумушладан бири болгъанлай къалайды. Нек дегенде социал сетьледе жайылгъан билдириуле, электрон амал бла Интернетде чыкъгъан газетле дунияны башын алып баргъанлары баямды.  Жангыз газетибизни сакълар ючюн, аны бла къалмай, тиражын ёсюдюрюр амалланы да излейбиз. Аслам эс элледе жашагъанла бла байламлыкъны жюрютюрге, аланы хар жерде да тирилтирге бурулады. Озгъан айда журналистлерибиз Хабазгъа бла Элбрусха барып, эллени тарыхларына, жашау турмушларына жораланнган хапарланы жыйып келгендиле. Аллай материалла газетде энчи бетле бла белгиленип бериледиле.

Энди уа газетни тиражын жыл сайын сакъларгъа эмда ёсерин   себеплик этгенлени атларын айтыргъа тийишли кёребиз. КъМР-де Адамны эркинликлери жаны бла уполномоченный Зумакъулланы Борис, Черек эм Элбрус районланы администрацияларыны башчылары Къулбайланы Алан бла Сотталаны Къурман, КъМР-ни Бийик-тау къырал табийгъат заповеднигини таматасы Асанланы Зейтун, Черек районну администрациясыны таматасыны кенгешчиси Байсыланы Харун, «Къайсыннга жюз атлам» тарых эм маданият эсгертмелени сакълау фондну таматасы Тетууланы Хадис, Черек районда Халкъны социал жумушларын тамамлагъан комплексли араны оноучусуну къуллугъун толтургъан Улбашланы Келлет эм кёп башхала, аланы барысын да бу материалда сагъыныргъа онг жокъду, редакцияны керти шуёхларыдыла.

Тиражыбызны ёсюуюне Тырныауузда бла Къашхатауда почталаны таматалары Афашокъаланы Руслан бла Гажонланы Асият да уллу къошумчулукъ этгендиле.   Огъары Малкъарны, Бабугентни, Ташлы-Таланы, Герпегежни, Огъары Жемталаны, Булунгуну, Кёнделенни, Хасанияны, Яникойну, Каменканы, Хушто-Сыртны почта бёлюмлерини таматалары эм анда ишлегенле Темуккуланы Аминат, Таукенланы Сакинат, Бёзюланы Аминат, Къулбайланы Мадина, Хибиланы Зухура, Акъайланы Фатима, Фрийланы Аминат, Чапаланы Арзият, Тежаланы Татьяна, Мамуколаны Назир, Отарланы Зурият, Атмырзаланы Дарина, Улакъланы Танзиля, Ёзденланы Фатима, Асанланы Марина, Атаккуланы Фатима, Дадаланы Жаннет, Гыжгыланы Танзиля иги ишлегендиле, газетни магъанасын халкъгъа ангылатыр ючюн къалмайдыла. Барысына да ыразылыгъыбызны билдиребиз. 

Жазылыу къалай баргъаныны юсюнден айтханда, бу жол  иш бирси кезиуледен эсе къыйыныракъ баргъанды. Кампанияны ортасында биз башда сагъынылгъан газетледен иги да артха къалып бара эдик. Болсада арт он кюнню ичинде кёрюмдюбюз билинирча игиленнгенди, редакцияда ишлегенле да къармашхандыла, сора алчылыкъны ычхындырмагъандыла.

 Эллерибизни ичинде эм иги кёрюмдюню Къашхатауну почтасы болдургъанды, анда газетни 153 юйюр жаздыргъанды. Андан сора Огъары Малкъарда «Заманны» 121 адам аллыкъды. Почтаны таматасы Темуккуланы Аминатха эм аны биргесине уруннганлагъа редколлегияны атындан уллу ыспас этебиз. Элни администрациясыны башчысы Чаналаны Муса, школланы директорлары Жангоразланы Борис бла Темуккуланы Роза да къолларындан келгенча себеплик этгендиле газетге.

Кёнделенде жашагъанла газетни къадарына не заманда да уллу кёллю болмагъандыла. Элни администрациясыны башчысы Атмырзаланы Марат, школланы директорлары Атмырзаланы Мухтар бла Диналаны Тамара ишлеген жерлеринде газетни даражасын кётюрюрча иш бардыргъандыла. Сау болсунла. Энди «Заманны» элде 138 юйюр аллыкъдыла.   

Бабугентни администрациясыны таматасы Жангуразланы Рамазан, школланы директорлары Глашланы Фаризат бла Гилийланы Мурат элге, газетни тиражына да дайым къайгъырадыла. Почтаны таматасы уа Гасыланы Нафисат жыл сайын да ахшы кёрюмдюле болдурады жазылыу ишде. Шёндю бу элде 121 юйюр жазылгъанды «Заманнга».

Башха эллерибизде кёрюмдюле уа былайдыла: Хасания – 95, Тырныауузну тёрт почта бёлюмюнде – 141, Яникой бла Каменка – 87, Булунгу – 63, Герпегеж – 54, Ташлы-Тала – 44, Лашкута – 37, Хушто-Сырт – 35, Быллым – 21, Жанхотия – 21, Хабаз – 24, Кичибалыкъ – 22, Хабаз – 21, Къара-Суу – 21, Жангы Малкъар – 17, Бызынгы – 13, Бедик – 13, Огъары Жемтала – 11. 

Кесигиз кёргенликден, хар жерде да жазылыу кампания бирча бардырылмайды, алай ол ишге уллу кёллюлюк этмеген, адам саны бла артыкъ уллу болмагъан эллерибизни- Булунгуну, Герпегежни, Ташлы-Таланы, Хушто-Сыртны – почталарында ишлегенлени белгилерге сюебиз. Эллиле да тири къатышхандыла жазылыугъа. 

Газетни малкъар тилни айнытыугъа эм сакълаугъа уллу къошумчулукъ этгенин ангылап, тиражыбызны ёсерине къайгъыргъан, анга жыл сайын кертичилей къалып, жазылыу ишге себеплик этгенлени бир къауумуну атларын сагъыныргъа тийишли кёребиз. Сюд приставланы федерал службасыны КъМР-де Управлениясыны таматасы Бауаланы Ахмат,  «Гипсолит» биригиуню таматасы Тохаланы Хыйса, «Маяк» санаторийни таматасы Мамайланы  Галина, «Долина нарзанов» санаторийни таматасы Чапайланы Ибрагим, Элбрус районда электросетьлени таматасы Хапаланы Юсюп,  КъМР-ни Парламентини депутатлары Насталаны Алий-Солтан бла Залийханланы Эльдар, Элбрус районну  Халкъны социал жаны бла жалчытыу комплексли арасыны директору Этезланы Мажит, Элбрус районну Урунуу, иш бла жалчытыуну эмда социал къоруулау арасыны  таматасы Мырзаланы Замрат, Черек эм Элбрус районланы полиция бёлюмлерини таматалары Ёзденланы Ислам бла Байсолтанланы Къурман-Алий, «Приэльбрусье» миллет паркны таматасы Асанланы Мурат эм кёп башхала. 

Атлары сагъынылгъанлагъа редакцияда ишлегенлени, кесими атымдан да жюрек ыразылыгъымы билдиреме. Ала газетни тиражын кётюрюрге болушханлары бла малкъар халкъны маданият хазнасын, ана тилин сакъларгъа, тин хазнасын айнытыргъа да къошумчулукъ этедиле. Ол ишни тамамлауда газетибизни къаллай бир кючю болгъанын арсарсыз ангылайдыла.

Бюгюнлюкде газетибизни тиражын тюшюрмей, алгъа барыуубыз белгилерча шартды. Редакцияда ишлегенлеге аны бек жууаплы жумушха санайдыла, мындан ары да газетни бетлерин бютюн сейир, окъуулу болурча этиу бизни баш борчубузду. Башда сагъынылгъан кёрюмдюле бла окъуучуларыбызны таза жюрекден алгъышлайбыз, хар бирине ыспас этебиз, «Заманны» чынтты шуёхлары мындан арысында андан да кёп болурла деп ышанабыз.